Urban News

மதுரை, ஆக.31: மதுரை மாநகராட்சி தெற்கு மண்டலத்திற்கான புதிய அலுவலகம் நேற்று திறக்கப்பட்டது. மதுரை மேலமாரட் வீதியில் புதிய அலுவலகத்தை மேயர் தேன்மொழி திறந்து வைத்தார். மாநகராட்சி கமிஷனர் செபாஸ்டின், துணை மேயர் மன்னன் கலந்து கொண்டனர்.

கமிஷனர் செபாஸ்டின் கூறுகையில், ‘19 வார்டுகளை கொண்ட தெற்கு மண்டலத்திற்கான புதிய அலுவலகம் ரூ.2.25கோடி மதிப்பில் பல்வேறு வசதிகளுடன் கட்டப்பட்டுள்ளது. தற்போது கோட்டையில் இயங்கி வரும் தெற்குமண்டல அலுவலகம் இன்னும் 15நாட்களில் இந்த புதிய அலுவலகத்தில் முழுமையாக செயல்படும், என்றார். மண்டல தலைவர்கள் மாணிக்கம், குருசாமி, இசக்கிமுத்து, நாகராஜன் மற்றும் அதிகாரிகள், கவுன்சிலர்கள் கலந்து கொண்டனர்.

சென்னை, ஆக. 31: மாநகராட்சி சார்பில் 7 இடங்களில் ரூ5 கோடியே 70 லட்சம் செலவில் லிப்டுடன் கூடிய நடைமேம்பாலம் கட்டப்படுகிறது.

மாநகராட்சி சார்பில் சைதாப்பேட்டை நீதிமன்றம் அருகில் தாலுகா ஆபீஸ் சாலையில் கட்டப்படும் லிப்டுடன் கூடிய நடைமேம்பால பணியை மேயர் மா.சுப்பிரமணியன் நேற்று ஆய்வு செய்தார். பின்னர் அவர் நிருபர்களிடம் கூறியதாவது:

நுங்கம்பாக்கம், ஸ்டர்லிங் சாலையில் பொதுமக்களின் பயன்பாட்டுக்காக ரூ70 லட்சம் செலவில் கட்டப்பட்டுள்ள லிப்டுடன் கூடிய நடைமேம்பாலத்தை துணை முதல்வர் ஸ்டாலின் ஏற்கனவே திறந்து வைத்துள்ளார்.

இதற்கு பொதுமக்களிடம் கிடைத்த வரவேற்பை தொடர்ந்து, முதியவர்கள், பெண்கள் சாலையை கடக்கும் வகையில் சென்னையில் பல இடங்களில் லிப்ட் நடைமேம்பாலங்கள் கட்டப்படுகிறது.

ராயபுரம் பீச் ரயில் நிலையம் அருகே ரூ70 லட்சத்திலும், எழும்பூர் ரயில் நிலையம் அருகில் காந்தி இர்வின் சாலையில் ரூ90 லட்சத்திலும், பாரிமுனை என்.எஸ்.சி. போஸ் சாலையில்

ரூ80 லட்சத்திலும், அடையார் துர்காபாய் தேஷ்முக் சாலையில் ரூ80 லட்சத்திலும், வாலாஜா சாலை & பெல்ஸ் சாலை சந்திப்பில் ரூ80 லட்சம், வாலாஜா சாலை & காயிதே மில்லத் சாலை சந்திப்பில் ரூ80 லட்சத்தில் லிப்டுடன் கூடிய நடைமேம்பாலம் அமைக்க ஒப்பந்தங்கள் கோரப்பட்டுள்ளது. இப்படி 7 இடங்களில் ரூ5 கோடியே 70 லட்சம் செலவில் லிப்ட் நடைமேம்பாலம் அமைக்கப்படுகிறது.

சைதாப்பேட்டையில் ரூ90 லட்சம் செலவில் லிப்ட் நடைமேம்பாலம் அமைக்கும் பணி வேகமாக நடைபெற்று வருகிறது. நவம்பரில் பொதுமக்கள் பயன்பாட்டுக்கு திறக்கப்படும். இவ்வாறு மேயர் கூறினார்.