Urban News

கோபி, மே 20: கோபி அருகே உள்ள லக்கம்பட்டி பேரூராட்சிக்கு தாட்கோ மூலம் ரூ.20 லட்சம் நிதி ஒதுக்கீட்டில் புதிய அலுவலக கட்டடம் கட்டப்பட்டுள்ளது. புதிய கட்டட திறப்பு விழா பேரூராட்சித் தலைவர் நாராயணசாமி தலைமையில் நடைபெற்றது.

பேரூராட்சி புதிய அலுவலக கட்டடத்தை முன்னாள் அமைச்சர் என்.கே.கே.பெரியசாமி திறந்து வைத்துப் பேசினார் (படம்).

அவர் பேசுகையில், கடந்த ஒராண்டில் மட்டும் லக்கம்பட்டி பேரூராட்சியில் ரூ.2 கோடியே 30 லட்சம் செலவில் வளர்ச்சி திட்டப் பணிகள் நிறைவேற்றப்பட்டுள்ளது. இந்தியாவிலேயே யாரும் உருவாக்க முடியாத திட்டம் கலைஞர் காப்பீட்டுத் திட்டம் என்றார்.

பேரூராட்சி துணைத் தலைவர் துரைசாமி வரவேற்றார். நிர்வாக அதிகாரி முருகேசன் நன்றி கூறினார். முன்னாள் எம்.எல்.ஏ கோ.ப.வெங்கிடு, கோபி ஊராட்சி ஒன்றியக்குழுத் தலைவர் சரஸ்வதி குமாரசாமி, கோபி நகர திமுக செயலாளர் கோ.வெ.மணிமாறன், லக்கம்பட்டி பேரூராட்சி உறுப்பினர்கள் மற்றும் பொதுமக்கள் கலந்து கொண்டனர்

முருகன் கோவில் வளாகத்தில் ரூ.5.50 லட்சத்தில் காட்சி கோபுரம்

மஞ்சூர்: மஞ்சூர் அன்னமலை முருகன் கோவில் வளாகத்தில் காட்சி முனை கோபுரம் அமைக்க, சுற்றுலா மேம்பாட்டு கழகம் சார்பில் ரூ.5.50 லட்சம் நிதி ஒதுக்கப்பட்டுள்ளது. இயற்கை சூழ்ந்துள்ள மஞ்சூரில், பென்ஸ்டாக், அவலாஞ்சி, அப்பர்பவானி, அன்னமலை முருகன் கோவில் முக்கிய இடம் வகிக்கின்றன. கோடைசீசனில், ஊட்டி, குன்னூர் பகுதிக்கு படையெடுக்கும் சுற்றுலாப் பயணிகள் பலர், மஞ்சூர் சுற்று வட்டாரப் பகுதிகளையும் பார்வையிட வருகின்றனர்.

மஞ்சூர் அன்னமலை முருகன் கோவிலில் தரிசிக்கவும், இங்குள்ள இயற்கை காட்சிகளை ரசிக்கவும் வருபவர்களின் எண்ணிக்கை அதிகரிக்கிறது; வருவோர் வசதிக்காக, கீழ்குந்தா பேரூராட்சி சார்பில் அன்னமலை முருகன் கோவிலில் காட்சி முனை கோபுரம் அமைக்க திட்டமிடப்பட்டுள்ளது. இதற்காக சுற்றுலா மேம்பாட்டு திட்டத்தின் கீழ் 5.50 லட்சம் நிதி ஒதுக்கப்பட்டுள்ளது; 3 லட்சத்தில் காட்சிமுனை கோபுரம், காட்சி முனைக்கு செல்ல வசதியாக 2.5 லட்சத்தில் நடைபாதை அமைக்கவும் திட்டமிடப்பட்டு, பூமி பூஜை நடத்தப்பட்டது.