தினமணி 30.05.2010
ரூ. 4.40 லட்சத்தில் நடமாடும் கழிப்பறைகள் வாங்க மாநகராட்சி திட்டம்
திருப்பூர், மே 29: ரூ. 4.40 லட்சத்தில் 4 நடமாடும் கழிப்பறைகள் வாங்க, மாநகராட்சி நிர்வாகம் திட்டமிட்டுள்ளது. இக் கழிப்பறைகளை மாநகராட்சி நிர்வாகம் சார்பில் நடத்தப்படும் பொது நிகழ்ச்சிகளின்போது மக்கள் பயன்பாட்டுக்கு அளிக்க முடிவு செய்யப்பட்டுள்ளது.
திருப்பூர் மாநகராட்சி பகுதியில் போலியோ சொட்டு மருந்து முகாம், பொங்கல் விழா, சுதந்திர தின விழா, மருத்துவ முகாம், அரசு நலத்திட்ட உதவி வழங்கும் விழா உள்ளிட்ட பொதுநிகழ்ச்சிகள் பல்வேறு இடங்களில் நடத்தப்பட்டு வருகின்றன. இந் நிக ழ்ச்சிகள் சிலசமயங்களில் கழிப்பறை இல்லாத இடங்களில் நடத்தப்படும் போது அங்கு வரும் மக்கள், அரசு அலுவலர்கள் மிகுந்த சிரமத்துக்கு உள்ளாகி வருகின்றனர்.
இதற்காக, மாநகராட்சி நிர்வாகம் உடனடியாக 4 நடமாடும் கழிப்பறைகளை வாங்கத் திட்டமிட்டுள்ளது. ரூ. 4.40 லட்சம் உத்தேச மதிப்பில் வாங்கப்பட உள்ள இந்த நடமாடும் கழிப்பறைகள் மாநகராட்சி மற்றும் அரசு பொது நிகழ்ச்சிகளின்போது மக்கள் பயன்பாட்டுக்கு அளிக்கவும் முடிவு செய்யப்பட்டுள்ளது. இதற்கான தீர்மானம் திங்கள்கிழமை நடக்கும் மாமன்றக் கூட்டத்தில் ஒப்புதலுக்கு வைக்கப்பட உள்ளது.
