தினமலர் 31.12.2009
மெகா துப்புரவு பணி
திருநெல்வேலி: மேலப்பாளையத்தில் காய்ச்சல் பரவுவதை தடுக்க "மெகா' துப்புரவுப்பணி மாநகராட்சி சார்பில் துவக்கப்பட்டது.நெல்லை மாவட்டத்தின் பல்வேறு பகுதிகளிலும் காய்ச்சல் பரவியுள்ளது. நெல்லையில் குறிப்பாக மேலப்பாளையத்தில் பலர் காய்ச்சலால் பாதிக்கப்பட்டுள்ளனர்.
சிறுவர்கள் முதல் பெரியவர்கள் வரை பல்வேறு தரப்பினர் காய்ச்சலுக்கு ஆஸ்பத்திரியில் சிகிச்சை பெற்று வருகின்றனர். அரசு, தனியார் ஆஸ்பத்திரிகளில் காய்ச்சலுக்கு சிகிச்சை பெறுபவர்களின் எண்ணிக்கை அதிகமாக உள்ளது. கடந்த சில நாட்களுக்கு முன்பு மேலப்பாளையத்தில் காய்ச்சலால் பாதிக்கப்பட்ட சிறுவன் நவாஸ்கான் இறந்தான்.மேலப்பாளையத்தில் நிலவும் சுகாதாரக்கேடு பிரச்னைகளால் தான் காய்ச்சல் பரவிவருவதாக பல்வேறு தரப்பினரும் குற்றம் சாட்டுகின்றனர்.
தெருக்கள், ரோடுகளில் கழிவுத்தண்ணீர் தேங்குவது, குப்பைகள் குவிந்து கிடப்பது காய்ச்சலுக்கு மூலக்காரணம் என பலரும் கூறுகின்றனர்.இதையடுத்து மேலப்பாளையம் மண்டலத்திற்குட்பட்ட 28 முதல் 38ம்வார்டு முடிய 11 வார்டுகளில் சுகாதாரச்சீர்கேடுகளை சரிசெய்ய ஒருங்கிணைந்த "மெகா' கூட்டுத்துப்புரவுப்பணியை 2 நாட்கள் மேற்கொள்ள மாநகராட்சி நிர்வாகம் முடிவு செய்தது.மேலப்பாளையம் ஜின்னா திடலில் ஒருங்கிணைந்த கூட்டுத்துப்புரவுப்பணி நேற்று துவங்கப்பட்டது.
733 துப்புரவுப்பணியாளர்கள், 28 துப்புரவுப்பணி மேற்பார்வையாளர்கள், 13 துப்புரவு ஆய்வாளர்கள் கூட்டுத்துப்புரவுப்பணியில் ஈடுபட்டுள்ளனர். 23 வாகனங்கள் துப்புரவுப்பணிக்கு பயன்படுத்தப்படுகிறது. ஒரு துப்புரவு ஆய்வாளரின் கீழ் 2 துப்புரவுப்பணி மேற்பார்வையாளர்கள் கண்காணிப்பில் துப்புரவுப்பணியாளர்கள் தெருக்களில் சுகாதாரப்பணியில் ஈடுபட்டுள்ளனர்.
அனைத்து தெருக்களிலும் குப்பைக்கூளங்களை அற்றி, கழிவுநீரோடையை சுத்தப்படுத்தி, மண் மேடுகளை அகற்றி, கொசுமருந்து அடிக்கும் பணியில் 17 குழுக்கள் ஈடுபட்டுள்ளன. இன்றும் பணி தொடர்ந்து நடக்கிறது.
புத்தாண்டில் புதுப்பொலிவு : மேயர் ஏ.எல்.சுப்பிரமணியன் கூறும்போது, ""மாநகராட்சியில் மேலப்பாளையத்திற்கு முன்னுரிமை அளிக்கப்படுகிறது. 19, 26, 27 வார்டு மக்கள் பயன்பெறும் வகையில் 17 கோடி ரூபாய் மதிப்பீட்டில் புதிய குடிநீர்த்திட்டத்திற்கு துணை முதல்வர் ஸ்டாலின் அடிக்கல் நாட்டியுள்ளார். குடிநீர் பற்றாக்குறையை போக்க புதிய குழாய்கள் பதிக்க 3 கோடி ரூபாய் மானியத்தை அனுமதித்து துணை முதல்வர் உத்தரவிட்டுள்ளார். புதிய குடிநீர் குழாய்கள் பதிக்கும் பணி விரைவில் துவங்கும். மண்டல அலுவலக வளாகத்தில் புதிய குடிநீர்த்தொட்டி கட்டும் பணி நடக்கிறது. பணி நிறைவு பெற்றதும் குடிநீர்த்தொட்டியில் இருந்து குடிநீர் விநியோகம் பெறும் பகுதிகள் குறித்து தெரிவிக்கப்படும். பாபநாசம் அணையில் இருந்து குழாய்கள் மூலம் நெல்லைக்கு குடிநீர் வசதி அளிக்கும் 100 கோடி ரூபாய் மதிப்பீட்டிலான குடிநீர்த்திட்டத்திற்கு அரசு அனுமதி அளித்துள்ளது. 2 கோடி ரூபாய் மதிப்பீட்டில் முதற்கட்ட ஆய்வுப்பணிகள் நடக்கவுள்ளது. இப்பணிகள் நிறைவு பெற்றதும் குடிநீர் தட்டுப்பாடு பிரச்னை நீங்கும். மேலப்பாளையத்தில் சிக்கன்குன்யா காய்ச்சல் பரவவதை தடுக்க முன்னெச்சரிக்கை நடவடிக்கைகள் எடுக்கப்பட்டுள்ளது. 11 வார்டுகளிலும் சேர்த்து 850 அலுவலர்கள், துப்புரவுப்பணியாளர்கள் துப்புரவுப்பணியில் ஈடுபடுகின்றனர். 2 நாட்கள் துப்புரவுப்பணிக்கு பின் புத்தாண்டு நாளில் மேலப்பாளையம் புதுப்பொலிவுடன் காட்சியளிக்கும்'' என்றார்.
எனக்கும் காய்ச்சல் தான்'... மாநகராட்சி மேயர் ஆதங்கம் :
மேயர் ஏ.எல்.சுப்பிரமணியன் நிருபர்களிடம் கூறும் போது, ""நெல்லையில் காய்ச்சல் பரவியுள்ளது. 2 எம்.எல்.ஏ.,க்கள் காய்ச்சலால் பாதிக்கப்பட்டுள்ளனர். எனக்கும் 4 நாட்களுக்கு முன்பு காய்ச்சல் இருந்தது. மேலப்பாளையத்தில் காய்ச்சல் பரவுவதை தடுக்க மாநகராட்சி சார்பில் மருத்துவ முகாம் நடந்தது. 2 ஆயிரம் பேர் பரிசோதனை செய்துகொண்டனர். 60 பேருக்கு சிக்கன்குன்யா காய்ச்சல் உள்ளது. காய்ச்சல் பரவுவது கட்டுக்குள் உள்ளது. தேவைப்பட்டால் அடுத்த வாரம் மேலும் ஒரு மருத்துவ முகாம் நடத்த திட்டமிடப்பட்டுள்ளது.'' என்றார்.
