தினமணி 09.12.2009
கூவம் ஆறு சீரமைப்பு 10 ஆண்டுகளுக்குள் முடிக்க திட்டம்
சென்னை, டிச. 8: ""சென்னையில் கூவம் ஆற்றைச் சீரமைக்கும் திட்டத்தை 10 ஆண்டுகளுக்குள் முடிக்கத் திட்டமிடப்பட்டுள்ளது'' என்று துணை முதல்வர் மு.க.ஸ்டாலின் தெரிவித்தார்.
சென்னை புதுப்பேட்டையில் உள்ள லாங்க்ஸ் கார்டன் சாலையில் கூவம் ஆற்றின் கரையோர ஆக்கிரமிப்புகள் அகற்றப்பட்டுள்ளன. பொதுப்பணித் துறைக்குச் சொந்தமான இந்த 980 மீட்டர் நீளமுள்ள இடம் ஆக்கிரமிப்பாளர்களிடம் இருந்து மீட்கப்பட்டுள்ளது. கூவம் ஆற்றை அழகுபடுத்தும் திட்டத்தின் ஒருபகுதியாக, இந்த இடத்தில் பூங்கா அமைக்கப்பட உள்ளது.
இதற்காக, மாநகராட்சி வசம் இந்த இடம் ஒப்படைக்கப்பட்டுள்ளது. இந்த நிலையில், கூவம் ஆற்றைச் சீரமைக்கும் பணிகள் குறித்த ஆய்வை லாங்க்ஸ் கார்டன் பகுதியில் செவ்வாய்க்கிழமை மேற்கொண்டார் துணை முதல்வர் மு.க.ஸ்டாலின்.
பின்னர், செய்தியாளர்களிடம் அவர் கூறியது:
""கூவத்தைப் போன்று சிங்கப்பூரில் ஓடிய 10 கி.மீ., நீளமுள்ள ஆற்றை சீரமைக்க சுமார் 10 ஆண்டுகள் ஆயின. சென்னையில் ஓடும் கூவம் ஆற்றின் நீளம் 18 கி.மீ. ஆகும். சீரமைப்புத் திட்டத்தை 10 ஆண்டுகளுக்கு முன்பே முடிக்க திட்டமிட்டுள்ளோம்.
திருவள்ளூர் மாவட்டத்தில் கூவம் ஆறு 54 கி.மீ., நீளம் ஓடுகிறது. இரண்டு மாவட்டங்களிலும் சேர்த்து கூவம் ஆற்றின் நீளம் 72 கி.மீ. ஆகும்.
நிர்வாகக் குழு... கூவம் ஆற்றைச் சீரமைக்க முதலில், அதைச் சுத்தப்படுத்த வேண்டும். இதற்காக, ஆக்கிரமிப்புகள் அகற்றப்பட்டு, சம்பந்தப்பட்டவர்களுக்கு மாற்று இடம் வழங்கப்பட்டு வருகிறது.
கூவம் சீரமைப்புப் பணி என்பது பல்வேறு துறைகளும் இணைந்து செய்ய வேண்டியதாகும். பொதுப்பணி, உள்ளாட்சி, சென்னை குடிநீர் வழங்கல் வாரியம், சென்னை பெருநகர வளர்ச்சிக் குழுமம், குடிசை மாற்று வாரியம் ஆகிய துறைகள் ஒருங்கிணைந்து இப் பணிகளை மேற்கொள்ளும்.
இந்தப் பணிகளைச் செய்வதற்கு தலைமைச் செயலாளர் தலைமையில் நிர்வாகக் குழு அமைக்கப்படும். மேலும், பல்வேறு துறைகள் இணைவதால் அவற்றை ஒருங்கிணைக்க தனியாக ஒருங்கிணைப்புக் குழுவும் ஏற்படுத்தப்படும்.
10 ஆயிரம் ஆக்கிரமிப்புகள்... கூவம் ஆறு சீரமைப்பின் முதல் கட்டப் பணிகளுக்கு ரூ.1200 கோடி செலவாகும் என்று மதிப்பிடப்பட்டுள்ளது.
கூவம் ஆறு சென்னை, திருவள்ளூர் என இரண்டு மாவட்டங்களையும் கடக்கிறது. இரு மாவட்டங்களிலும் மாநகராட்சி, நகராட்சி, பேரூராட்சி, ஊராட்சி போன்றவை வருகின்றன. எனவே, உள்ளாட்சி பகுதிகளில் சுமார் ரூ.200 கோடி மதிப்பில் புதிதாக பாதாள சாக்கடை திட்டப் பணிகள் செயல்படுத்தப்படும். ஏற்கெனவே உள்ள பாதாள சாக்கடைத் திட்டங்கள் ரூ.117 கோடியிலும், ஆற்றின் கரைப் பகுதிகள் ரூ.200 கோடியிலும் மேம்படுத்தப்படும்.
ஜவஹர்லால் நேரு தேசிய நகர்ப்புற மேம்பாட்டுத் திட்டத்தின் கீழ், மாநகராட்சிக்கு ரூ.600 கோடி ஒதுக்கப்பட்டுள்ளது. தேவையான நிதி ஆதாரங்கள் இறுதி செய்யப்பட்டு பணிகள் தொடங்கப்படும்.
சென்னையில் உள்ள நீர்வழிப் பகுதிகளில் முதலில் கூவம் ஆறு சீரமைக்கப்படும். இதைத் தொடர்ந்து, பிற ஆறுகளை சீரமைப்பது குறித்து பரிசீலிக்கப்படும்.
அடையாறு, பக்கிங்காம் கால்வாய் போன்றவற்றில் இருந்து வெளியேறும் கழிவு நீர் கூவம் ஆற்றில் கலக்கிறது. இதனால், கூவம் மேலும் அசுத்தமாகிறது. இதனால், கூவத்தைப் போல மற்ற ஆறுகளையும் சுத்தம் செய்வது அவசியம்'' என்றார் துணை முதல்வர் மு.க.ஸ்டாலின்.
இந்த நிகழ்ச்சியில், பொதுப்பணித் துறை செயலாளர் ராமசுந்தரம், துணை முதல்வரின் செயலாளர் தீனபந்து உள்ளிட்ட பலர் கலந்து கொùண்டனர்.
