Urban News

உதகை, ஆக 17: உதகை ஏரியில் கழிவுநீர் கலக்காமல் தடுக்கப்படும் என, நகராட்சிகளின் மண்டல இயக்குநர் பாலச்சந்திரன் தெரிவித்தார்.

 உதகை நகரின் பிரதான கழிவுநீர்க் கால்வாயான கோடப்பமந்து கால்வாயிலிருந்து வெளியேறும் கழிவுநீர் உதகை ஏரியில் கலந்து ஏரியே மாசடைந்துள்ளதாக புகார் கூறப்பட்டு வந்தது. இதுதொடர்பாக தமிழக சுற்றுச்சூழல் துறை செயலர் சங்கர் தலைமையிலான அதிகாரிகள் குழுவினர் ஏற்கனவே ஆய்வு நடத்தியிருந்தனர்.

 இதைத்தொடர்ந்து நகராட்சிகளின் மண்டல இயக்குநர் பாலச்சந்திரன் உதகையில் வெள்ளிக்கிழமை நேரில் ஆய்வு செய்தார். இந்த ஆய்வின்போது நகராட்சி ஆணையர் சிவகுமார், நகர்மன்ற பொறியாளர் ராமமூர்த்தி உள்ளிட்டோரும் பங்கேற்றனர். ஆய்வின் முடிவில் செய்தியாளர்களிடம் பாலச்சந்திரன் தெரிவித்ததாவது:

 உதகை நகரின் கழிவுநீர் கோடப்பமந்து கால்வாயிலிருந்து உதகை ஏரிக்குள் செல்வது முழுமையாக தடுக்கப்படும். கழிவுநீர் அனைத்தும் காந்தல் பகுதியிலுள்ள சுத்திகரிப்பு நிலையத்துக்கு கொண்டு செல்லப்பட்டு அங்கிருந்து சுத்திகரிக்கப்பட்ட நீரே வெளியேற்றப்படும். கோடப்பமந்து கால்வாயிலிருந்து வெளியேறும் கழிவுநீர் அனைத்தும் சுத்திகரிக்க நடவடிக்கை எடுக்கப்பட்டு வருகிறது.

 உதகை நகரில் திறந்தவெளிக் கால்வாய்களிலிருந்து கழிவுநீர் ஏரிக்குள் செல்லாமலி ருக்கவும் நடவடிக்கை எடுக்கப்படும். தற்போது சுமார் 6,000 கட்டடங்கள் இணைப்பு பெறாமல் கழிவுநீரை திறந்தவெளியில் விடுகின்றனர். இவை அனைத்தும் பாதாள சாக்கடை குழாய்களில் இணைக்கப்படும். இதற்கான கட்டணத்தை சம்பந்தப்பட்ட கட்டடங்களின் உரிமையாளர்களிடமிருந்து தவணை மூலம் பெறவும் நடவடிக்கை எடுக்கப்படும்.

 தமிழக அரசின் பசுமை குடியிருப்பு திட்டத்தின் கீழான வீடுகளுக்கும், அரசின் சிறப்பு திட்டங்களின் வீடுகளுக்கும் இலவசமாகவே கழிவுநீர் இணைப்புகள் வழங்கப்படுமெனவும் பாலச்சந்திரன் தெரிவித்தார்.

இணைப்பை சீராக்க திட்டம்கோடப்பமந்து கால்வாயை ஒட்டியுள்ள பகுதிகளில் மட்டும், கடந்த சில ஆண்டுகளில் ஏராளமான புதிய வீடுகள் கட்டப்பட்டுள்ளன; இதில்,"6,000 வீடுகளின் கழிவறை மற்றும் கழிவுநீர் வெளியேறும் இணைப்புகள், கோடப்பமந்து கால்வாயில் திறந்த வெளியில் விடப்பட்டுள்ளன,' என நகராட்சி நிர்வாகத்தின் ஆய்வில் தெரியவந்துள்ளது. இந்நிலையில், திறந்தவெளியில் செல்லும் கழிவுநீர் கால்வாயை பாதாள சாக்கடைக்குள் விடுவதற்கான நடவடிக்கையை நகராட்சி நிர்வாகம் முடுக்கிவிட்டுள்ளது.ஊட்டி நகராட்சி கமிஷன் சிவகுமார் கூறியதாவது;திறந்த வெளியிலும், ஏரி நீரிலும் மனித கழிவுகள் தேங்குவதால் பலவித நோய்கள் வரும் என்பதால் திறந்தவெளியில் கழிவுகள் கட்டப்படுவதை தடுக்க மாநில அரசு முனைப்பு காட்டி வருகிறது.

 

ஊட்டி கோடப்பமந்து கால்வாயில் திறந்தவெளியில் கழிப்பறை மற்றும் கழிவறை கழிவுகளின் இணைப்பை பலர் விட்டுள்ளனர்; இவர்கள், பாதாள சாக்கடையில் தங்களது இணைப்புகளை விட நகராட்சியில், 3,000 ரூபாய் கட்டணம் செலுத்தி விண்ணப்பிக்க வேண்டும்; ஒரே சமயத்தில் 3,000 ரூபாய் கட்டணத்தை செலுத்த முடியாதவர்கள் ஆறு மாத தவணையில் தலா 500 வீதம் செலுத்தி, தங்களது கழிவுநீர் இணைப்பை, பாதாள சாக்கடைக்குள் விடுவதற்கான வாய்ப்பை பயன்படுத்தி கொள்ள வேண்டும்.நகராட்சி எல்லைக்குள், மாநில அரசின் குடிசை மேம்பாட்டு திட்டத்தின் கீழ் கட்டப்பட்டுள்ள வீடுகளுக்கு நகராட்சி சார்பில் கழிவுநீர் இணைப்புகளை பாதாள சாக்கடைக்குள் விடும் பணியை இலவசமாகவே செய்து கொடுக்க அரசு அறிவுறுத்தியுள்ளது. எனவே, நகராட்சியின் நடவடிக்கைக்கு பொதுமக்கள் ஒத்துழைக்க வேண்டும். இவ்வாறு, சிவகுமார் கூறினார்.