Urban News

காரைக்கால், நவ. 8: காரைக்கால் நகரக் குடியிருப்புப் பகுதியில் கழிவுநீரோடு கலந்து குப்பைகள் தேங்குவதாகவும், நகராட்சி நிர்வாகம் இவற்றை அகற்ற நடவடிக்கை எடுக்கவில்லை எனவும் பொதுமக்கள் தெரிவித்தனர்.

காரைக்கால் நகரில் குப்பைகளை நகராட்சி நிர்வாகம் தனியார் மூலம் அகற்றி வருகிறது. உரிய முறையில் இந்தப் பணிகளை நகராட்சி நிர்வாகம் கண்காணிப்பதில்லை எனப் பொதுமக்கள் குற்றஞ்சாட்டி வருகின்றனர்.

இந்நிலையில், பல்வேறு இடங்களில் சாலையோரங்களில் கொட்டப்படும் குப்பைகள் அவ்வப்போது அகற்றப்படாததால், பல நாள்களாக அவை தேங்கிக்கிடக்கின்றன.

காரைக்கால் தலைமை அஞ்சல் நிலையம் அருகே கழிவுநீர் செல்லும் பாதை அருகிலேயே குப்பைகள் கொட்டப்பட்டுள்ளன. இதனால், கழிவுநீர் எளிதில் வடிய முடியாமல் சாலையில் தேங்குவதாக அந்தப் பகுதியினர் தெரிவித்தனர்.

மழைக் காலம் என்பதால் நகரில் குப்பைகள், கழிவுநீர் தேங்காத வகையில் உரிய முறையில் கண்காணித்து, அவற்றை உடனுக்குடன் அகற்ற நகராட்சி நிர்வாகம் நடவடிக்கை எடுக்க வேண்டும் எனப் பொதுமக்கள் வலியுறுத்தினர்.

திருப்பூர், நவ.8: திருப்பூர் மாநகரில் தீபாவளி பண்டிகையையொட்டி கடந்த 3 நாட்களில் பட்டாசு கழிவுகள் உட்பட 300 டன் அளவுக்கு குப்பைகள் அதிகளவில் சேகரிக்கப்பட்டுள்ளது.

பல லட்சம் மக்கள் வசித்து வரும் திருப்பூர் மாநகரில், நாளொன்றுக்கு 400 டன் குப்பைகள் கொட்டப்பட்டு வருவதாக மாநகராட்சி புள்ளி விவரங்கள் தெரிவிக்கின்றன. 52 வார்டுகளிலும் சுமார் 800 துப்புரவு ஊழியர்களை கொண்டு குப்பைகள் சேகரிக்கும் பணி மேற்கொள்ளப்பட்டு வருகிறது. தீபாவளி பண்டிகையையொட்டி, லட்சக்கணக்கான பொதுமக்கள் வெளியூர் சென்று விட்டநிலையில், கடந்த 3 நாட்களில் குப்பைகளின் அளவு கணிசமாக உயர்ந்துள்ளதாக கூறுகின்றனர் மாநகராட்சி அதிகாரிகள்.

"திருப்பூர் மாநகரில் தினமும் 400 டன்னுக்கு குறையாமல் குப்பைகள் கொட்டப்பட்டு வருகிறது. ஆனால் கடந்த 3 நாட்களில் இதன் அளவு கிட்டத்தட்ட 25 சதவீதம் அதிகரித்துள்ளது. அதாவது கடந்த 3 நாட்களில் நாளொன்றுக்கு சுமார் 500 டன் குப்பைகள் அள்ளப்பட்டுள்ளன. இவற்றில் பெரும்பாலானவை பட்டாசு குப்பை," என மாநகராட்சி சுகாதாரத்துறையினர் தெரிவித்தனர்.3 நாளில் 300 டன் அதிகம் : தீபாவளி கடந்த 5ம் தேதி கொண்டாடப்பட்ட நிலையில், அன்றும், தீபாவளிக்கு முந்தைய நாளும், அடுத்தநாளும் என 3 நாட்களில் தலா 100 டன் அடிப்படையில் கிட்டத்தட்ட 300 டன் குப்பை அதிகரித்துள்ளதாகவும் அவர்கள் தெரிவித்தனர். கடந்தாண்டை விட தீபாவளி பட்டாசு கழிவுகளின் அளவு இந்தாண்டு அதிகம் எனவும் மாநகராட்சி சுகாதாரத்துறையினர் தெரிவித்தனர்.

இதற்கிடையே மழை எச்சரிக்கை காரணமாக மாநகரில் கொட்டப்பட்ட குப்பை கழிவுகளை உடனுக்குடன் அகற்ற உத்தரவு பிறப்பிக்கப்பட்டிருந்தது. அதன்படி மாநகர் முழுவதும் குப்பைகள் அள்ளும் பணி கடந்த இரு தினங்களாக தீவிரமாக்கப்பட்டுள்ளது. இருப்பினும் தீபாவளி விடுமுறை காரணமாக சில பகுதிகளில் குப்பைகள் அள்ளப்படாமல், குவிந்து கிடந்தது.