Urban News

சென்னை, அக். 12: சென்னையைச் சேர்ந்த 5.5 லட்சம் பள்ளி மாணவர்களுக்கு குடற்புழு நீக்க மாத்திரைகள் குடற்புழுக்கள் நீக்க தினமான புதன்கிழமை (அக்.13) இலவசமாக வழங்கப்படும் என சென்னை மாநகராட்சி சுகாதாரத் துறை அதிகாரி டாக்டர் பெ. குகானந்தம் தெரிவித்தார்.

""சென்னை மாநகராட்சியின் சார்பில் உலக சுகாதார நிறுவனம் பரிந்துரைத்துள்ள "ஆல்பென்டசோல்' என்ற குடற்புழு நீக்க மாத்திரை மாணவர்களுக்கு வழங்கப்படவுள்ளது. 400 மில்லி கிராம் எடை கொண்ட இந்த மாத்திரை, எளிதில் மென்று சாப்பிடக் கூடியது. இரண்டு வயதுக்கு மேற்பட்ட அனைவரும் இதைச் சாப்பிடலாம்.

குடற்பகுதியில் உள்ள அனைத்து குடற்புழுக்களையும், அதன் முட்டைகளையும், வயிற்றுப்போக்கோ அல்லது வாந்தியோ ஏற்படுத்தாமல் அழிக்கும். இதனால் நாம் உண்ணும் உணவில் உள்ள சத்துகள், குறிப்பாக இரும்புச் சத்து உடலின் இயக்க மண்டலத்துக்கு முழுமையாகச் சென்றடையும். மேலும் இந்த புழுக்களால் ஏற்படும் ரத்த சோகை நோய் இளம் மாணவர்களுக்கு உடல் நலம் மற்றும் மன வளர்ச்சி சார்ந்த பிரச்னைகளைக் குறைக்கும்.

"ஆல்பென்டசோல்' மாத்திரையைச் சாப்பிடுவதால் எந்தவித பக்க விளைவுகளும் ஏற்படாது'' என்றார் டாக்டர் பெ.குகானந்தம்.

அம்பத்தூர் : அம்பத்தூர் நகராட்சி பகுதியில் பறிமுதல் செய்யப்பட்ட குடிநீர் பாக்கெட்களை, நகராட்சி கமிஷனர் முன்னிலையில் சுகாதார துறையினர் அழித்தனர்.அம்பத்தூர், ஆவடி நகராட்சி பகுதிகள், திருநின்றவூர் பேரூராட்சி மற்றும் சுற்றியுள்ள புறநகர் பகுதிகளில் உள்ள டாஸ்மாக் பார்கள், குளிர்பான கடைகளில் தரமற்ற, சுகாதாரமில்லாத குடிநீர் பாக்கெட்கள் விற்பனை செய்யப்படுகின்றன. ஐ.எஸ்.ஐ., முத்திரை இல்லாத, இந்த பாக்கெட் குடிநீரை அருந்துபவர்களுக்கு நோய்கள் பரவுகின்றன.இது குறித்து "தினமலர்' நாளிதழில் செய்தி வெளியானது. அம்பத்தூர் நகராட்சி கமிஷனர் ஆஷிஷ் குமார் உத்தரவின் பேரில், நகர் நல அலுவலர் டாக்டர் மணிமாறன் தலைமையில் சுகாதார துறையினர் கடந்த இரண்டு நாட்களாக அதிரடி சோதனை நடத்தினர்.வரதராஜபுரம், ரயில்வே ஸ்டேஷன் சாலை, அம்பத்தூர் ஓ.டி., பஸ் நிலையம், கள்ளிக்குப்பம், பாடி, மண்ணூர்பேட்டை உள்ளிட்ட பகுதிகளில் இருந்த குளிர்பான கடைகள், டாஸ்மாக் பார்களில் சோதனை நடந்தது.ஐ.எஸ்.ஐ., முத்திரையில்லாதவை, காலாவதியான குடிநீர் பாக்கெட்கள் மூட்டை, மூட்டையாக பறிமுதல் செய்யப்பட்டன. நகராட்சி தலைவர் சேகர், கமிஷனர் ஆஷிஷ் குமார் முன்னிலையில், நகராட்சி வாகனம் மூலம் அழிக்கப்பட்டது.தரமற்ற குடிநீர் பாக்கெட்களை விற்பனை செய்த கடைக்காரர்கள், பார் உரிமையாளர்கள் மீது நடவடிக்கை எடுக்கப்படும் என அதிகாரிகள் தெரிவித்தனர்.