Urban News

தினகரன்          20.11.2013

தொண்டாமுத்தூரில் தீவிர டெங்கு காய்ச்சல் தடுப்பு வாகன பிரசாரம்

தொண்டாமுத்தூர், : கோவை அருகே தொண்டாமுத்தூர் பேரூராட்சி சார்பில் தீவிர டெங்கு காய்ச்சல் மற்றும் கோமாரி நோய் தடுப்பு வாகன பிரசாரம் துவங்கியது. பிரசாரத்தை பேரூராட்சி தலைவர் ரவி துவக்கி வைத்தார்.

பிரசார வாகனம் கெம்பனூர், குப்பேபாளையம், வண்டிகாரனூர், வலையபாளையம், காளியண்ணன்புதூர், முத்திபாளையம், மல்லிகை நகர், தொண்டாமுத்தூர் உட்பட 15 வார்டுகளில்  வீதி, வீதியாக  சென்று டெங்கு காய்ச்சல் மற்றும் கோமாரி நோய் தடுப்பு குறித்து பொதுமக்களிடம் விரிவாக விளக்கி பேசினர்.

பிரசாரத்தில் பேரூராட்சி செயல் அலுவலர் அசோக்குமார், துணைத்தலைவர் சேகர், கவுன்சிலர்கள், பொதுமக்கள் உட்பட பலர் கலந்து கொண்டனர்.

தினகரன்          20.11.2013

385 இடங்களில் நம்ம டாய்லெட்

தாம்பரம், : தமிழகத்தில் 385 இடங்களில் நம்ம டாய்லெட் அமைக்கப்பட உள்ளது என நகராட்சி நிர்வாக ஆணையர் தெரிவித்தார்.

உலக கழிப்பறை தினத்தை முன்னிட்டு தமிழகம் முழுவதும் கழிப்பறைகளில் தீவிர துப்புரவு பணி முகாம் நடந்தது. பல்லாவரம் நகராட்சியில் துப்புரவு பணியை நகராட்சி நிர்வாக ஆணையர் சந்திரகாந்த் காம்ப்ளே தொடங்கி வைத்தார். பின்னர் குரோம்பேட்டை பஸ் நிலையம், சி.எல்.சி. லைன், கோதண்டன் நகர் பகுதிகளில் உள்ள கழிப்பறைகளை ஆய்வு செய்தார்.

பின்னர், நிருபர்களி டம் அவர் கூறுகையில், தமிழகம் முழுவதும் உள்ள நகராட்சிகளில் பொதுமக்கள் அதிகம் கூடும் இடங்கள், சுற்றுலா தளங்கள், பஸ் நிலையங்கள் உள்ளிட்ட பல்வேறு இடங்களில் இலவசமாக பயன்படுத்தும் நம்ம டாய்லெட் 385 இடங்களில்  அமைக்கப்படவுள்ளன. இந்த பணி 4 மாதத்தில் முடிக்க அறிவுறுத்தப்பட்டுள்ளது என்றார். மண்டல நகராட்சி ஆணையர் லட்சுமி, நகராட்சி ஆணையர் ராமமூர்த்தி மற்றும் உள்ளாட்சி பிரதிநிதிகள் கலந்துகொண்டனர்.

தாம்பரம்- வேளச்சேரி சாலையில் நகராட்சி நிர்வாக உதவி இயக்குனர் ஜெயலட்சுமி தலைமையில் கழிப்பறை பயன்படுத்துவது குறித்து விழிப்புணர்வு மனித சங்கிலி நடந்தது. இதில் நகராட்சி ஆணையர் சிவசுப்பிரமணியன், பள்ளி மாணவர்கள் கலந்து கொண்டனர்.