Urban News

சத்தியமங்கலம்,மே 13: சத்தியமங்கலத்தில் காலாவதியான குடிநீர் பொருள்களை சுகாதார துறையினர் வியாழக்கிழமை பறிமுதல் செய்தனர்.

சத்தியமங்கலம் நகராட்சியில் காலாவதியான பொருள்கள் விற்பனை குறித்து சோதனை நடத்துமாறு நகராட்சி நிர்வாக இயக்குநர் உத்தரவிட்டதன் பேரில், அரசு ஆரம்ப சுகாதார நிலைய மருத்துவர் செல்வம், துப்புரவு அலுவலர் கே.சக்திவேல், துப்புரவு ஆய்வாளர்கள் ஆர்.ராமமூர்த்தி, ஈஸ்வரன், சத்தி தனி வருவாய் ஆய்வாளர் ரஜித்குமார் ஆகியோர் வியாழக்கிழமை மளிகைக்கடை, தேநீர், பேக்கரி, டிபார்ட்மெண்டல் ஸ்டோர்களில் ஆய்வு செய்தனர்.

தயாரிப்பு நாள் மற்றும் காலாவதி நாள் உள்ளிட்ட விவரங்கள் இல்லாத குடிநீர் பாக்கெட்டுகள், பாட்டில்கள், முறுக்கு, காரவகை மசாலா, மாவுப் பொருள்கள், பேரிட்சை மற்றும் சாயம் கலந்த இனிப்பு வகைகள், உணவு எண்ணெய் வகைகள் பறிமுதல் செய்யப்பட்டு, நகராட்சி குப்பைக் கிடங்கில் கொட்டி அழித்தனர்.

உசிலம்பட்டி, மே 13: மதுரை மாவட்டம், உசிலம்பட்டி நகராட்சி பகுதியில் சுகாதாரத் துறை துணை இயக்குநர் பழனிச்சாமி உத்தரவின் பேரில், தொட்டப்பநாயக்கனூர் வட்டார மருத்துவ அலுவலர் சபிதா தலைமையில், காவல் துறை சார்பு ஆய்வாளர் செந்தில்குமார் முன்னிலையில் காலாவதியான உணவுப் பொருள்கள் ஆய்வு செய்யப்பட்டன.

இதில் சுமார் 46 கடைகளில் சோதனை மேற்கொள்ளபட்டது. இதில் நகராட்சி உணவு ஆய்வாளர் சரவணபிரபு மற்றும் தொட்டப்பநாயக்கனூர் சுகாதார ஆய்வாளர்கள் அக்னி கணேசன், நாகராஜ், செல்வராஜ், ஜோதிவாசு, கருப்பசாமி ஆகியோர் சோதனை மேற்கொண்டனர். குறிப்பாக பான்பராக், குட்கா, தண்ணீர் பாக்கெட், பிஸ்கெட், புரூட் மிக்சர், ஜூஸ் தயாரிக்கப் பயன்படும் பவுடர் ஆகியன சோதனையிடப்பட்டன.