தினமணி 19.04.2010
நெல்லையில் சுகாதார சீர்கேட்டைத் தடுக்க பன்றிகளைப் பிடிக்கத் திட்டம்: வளர்ப்போர் பட்டியல் தயாராகிறதுதிருநெல்வேலி,ஏப்.18: திருநெல்வேலி மாநகர்ப் பகுதியில் சுகாதார சீர்கேட்டை ஏற்படுத்தும் பன்றிகளைப் பிடிக்க மாநகராட்சி திட்டமிட்டு வருகிறது.
பன்றி வளர்ப்போர் பட்டியலைத் தயார் செய்து, அவர்கள் மீது கடுமையான நடவடிக்கை எடுப்பதற்கும் மாநகராட்சி ஆலோசனை செய்து வருகிறது.
இம் மாநகர் பகுதியில் மிகுந்த சுகாதார சீர்கேடு நிலவுவதாக புகார் கூறப்பட்டு வருகிறது. இதை உறுதிப்படுத்தும் விதமாக, அவ்வப்போது மூளைக்காய்ச்சல், பன்றிக் காய்ச்சல், சிக்குன்குனியா, டைபாய்டு, மலேரியா, மஞ்சள் காமாலை போன்ற தொற்று நோய்கள் பரவுகின்றன.
கடந்த மழைகாலத்தின்போது பரவிய சிக்குன்குனியா காய்ச்சலின் தாக்கம், மாநகரின் பல பகுதிகளில் இன்னும் இருந்து கொண்டு இருக்கிறது. சுகாதார சீர்கேடு அதிகமாக ஏற்படுவதற்கு போதிய துப்புரவுப் பணியாளர்கள் இல்லாமல் இருப்பதுதான் முக்கிய காரணம் என மாநகராட்சி சார்பில் அப்போது கூறப்பட்டது. இதன் காரணமாக துப்புரவுப் பணி, ஒரு சில பகுதிகளில் தனியார் தொண்டு நிறுவனங்களிடம் ஒப்படைக்கப்பட்டுள்ளது.
இந்த நடவடிக்கையின் ஒரு பகுதியாக, மாநகரில் பெரும் சுகாரதார சீர்கேட்டை ஏற்படுத்தும் பன்றிகளைப் பிடிக்க மாநகராட்சி திட்டமிட்டது. முதல்கட்டமாக மாநகரில் சுமார் 2 ஆயிரத்தில் இருந்து 3 ஆயிரம் பன்றிகள் வரை இருப்பதாக கணக்கெடுக்கப்பட்டுள்ளது.
சில நாள்களுக்கு முன் இப் பன்றிகளை பிடிப்பதற்கு, மதுரையில் இருந்து சுமார் 20 பேரை மாநகராட்சி அழைத்து வந்தது. இவர்கள் பாளையங்கோட்டை இந்திராநகர், பெரியார் நகர், வண்ணார்பேட்டை பேராச்சியம்மன் கோயில் பகுதி, சந்திப்பு மீனாட்சிபுரம் பகுதிகளில் பன்றிகளைப் பிடித்தனர். மொத்தம் 120 பன்றிகள் பிடிக்கப்பட்டு, மதுரைக்கு கொண்டு செல்லப்பட்டன.
இதில், பன்றி பிடித்தவர்களுக்கு மாநகராட்சி ஊதியம் வழங்காமல், பிடிக்கப்படும் பன்றிகளை அவர்களே எடுத்துச் செல்லலாம் என்று அறிவித்து இருந்தது. மேலும் பன்றி பிடிக்கும்போது கடந்த ஆண்டு ஏற்பட்டதுபோல மோதல் ஏற்படாமல் இருப்பதற்கு, மாநகர போலீஸôர் பாதுகாப்புடனே பன்றிகள் பிடிக்கப்பட்டன.
பிடிக்கப்பட்ட பன்றிகளும் மதுரை வரை போலீஸ் பாதுகாப்புடனே கொண்டு செல்லப்பட்டன. மாநகரில் பாளையங்கோட்டையில் பன்றி பிடிக்கும்போதே, அந்தத் தகவல் பிற பகுதியில் பன்றி வளர்ப்போருக்கு தெரிந்ததால், அவர்கள் பன்றிகளை வெளியே விடாமல் அடைத்து வைத்துக் கொண்டனராம். இதனால் பன்றிகளை அதிக அளவில் பிடிக்க முடியாமல் போய்விட்டதாகக் கூறப்படுகிறது. இருப்பினும் மாநகராட்சி, இன்னும் சில நாள்களில் மீண்டும் பன்றிகளைப் பிடிப்பதற்கு திட்டமிட்டு வருகிறது. இதற்காக முன்பு போல இல்லாமல், முழுமையான திட்டமிடலோடு செயல்படுவதற்கு சுகாதாரத்துறை பல விவரங்களை சேகரித்து வருகிறது. இதில் பேட்டை, சந்திப்பு மீனாட்சிபுரம் பகுதிகளில் அதிகமாக பன்றி இருப்பது கண்டறியப்பட்டுள்ளது.
மாநகராட்சியின் இந்த தீவிர நடவடிக்கை, பன்றி வளர்ப்போரிடம் கலக்கத்தை ஏற்படுத்தியுள்ளது. இதன் காரணமாக சிலர் தங்களது பன்றிகளை வேறு ஊர்களுக்கு அனுப்பி வருகின்றனராம்.
அடுத்தக் கட்ட நடவடிக்கையாக, பன்றி வளர்ப்போர் பட்டியலை தயார் செய்து வருகிறது. இந்த பட்டியலின் அடிப்படையில், அவர்கள் மீது குற்றவியல் வழக்குத் தொடர்ந்து கடுமையான நடவடிக்கை எடுப்பது குறித்து மாநகராட்சி உயர் அதிகாரிகள் ஆலோசனை செய்து வருகின்றனர்.இந் நடவடிக்கைகள் மூலம் மாநகரத்தில் பன்றிகளை முழுமையாக ஒழித்துவிடலாம் என மாநகராட்சி கணித்துள்ளது. இதன் காரணமாக தொற்று நோய்கள் பரவுவது ஓரளவு கட்டுப்படுத்தப்படும் என சுகாதாரத்துறையைச் சேர்ந்த அதிகாரி ஒருவர் தெரிவித்தார்.
