Urban News

ஆலங்காயம் தேர்வுநிலை பேரூராட்சியில் பேரூராட்சிகளின் மண்டல உதவி இயக்குநர் மலையமான் திருமுடிகாரி ஆய்வு செய்தார்.

திடக் கழிவு மேலாண்மைத் திட்டத்தின் சார்பில், இங்குள்ள புலுகூர் பள்ளியில் அமைக்கப்பட்டுள்ள திடக் கழிவுகள் தரம் பிரித்து வைத்திருப்பதையும், சுகாதார வளாகங்கள் மற்றும் வளர்ச்சித் திட்டங்களையும் அவர் பார்வையிட்டார். பின்னர் பேரூராட்சி அலுவலகத்தில் கட்டப்பட்டுள்ள மழைநீர் சேகரிப்பு கட்டமைப்பை அவர் பார்வையிட்டார்.

இதையடுத்து, சௌர்ண ஜெயந்தி சாகரி ரோஜ்கார் யோஜன திட்டத்தின் சார்பில் பயிற்சி பெற்ற மகளிர் சுய உதவிக் குழுவினருக்கு நகர்ப்புற பெண்கள் சுய வேலைவாய்ப்புத் திட்டத்தின்படி ரூ.1.20 லட்சம் அரசு மானியத்துடன் வங்கிக் கடனை அவர் வழங்கினார்.

மேலும், பயனாளிகள் பங்குத் தொகையில் ரூ.3.50 லட்சத்தில் பாக்கு மட்டையில் தட்டுகள் செய்யும் இயந்திரத்தில் நடைபெறும் பணிகளையும் அவர் பார்வையிட்டார்.

பேரூராட்சி மன்றத் தலைவர் மஞ்சுளா கந்தன், துணைத் தலைவர் பாண்டியன், செயல் அலுவலர் கோபாலன் உள்ளிட்டோர் உடனிருந்தனர்.

பெரியநாயக்கன்பாளையம் பேரூராட்சி நிர்வாகம் பொதுமக்களே தங்களது வீடுகளில் இயற்கை உரம் தயாரிப்பதை ஊக்குவிக்கும் வகையில்,  தன்னார்வலர்களுக்கு "ஹேண்ட் இன் ஹெண்ட்' என்ற அமைப்பின் மூலமாக இயற்கை உர மண்பானைகளை இலவசமாக வழங்கியுள்ளது.

 இந்த அமைப்பு, மட்கும் மற்றும் மட்காத பொருள்களைப் பிரித்து அக் கழிவிலிருந்து பயனுள்ள பொருள்களைத் தயாரிக்கும் திட்டத்தை இப் பேரூராட்சியில் செயல்படுத்துகிறது. கடந்த ஆண்டு வீடுகளுக்கே நேரடியாகச் சென்று குப்பையைப் பெறும் திட்டத்தை செயல்படுத்தியது. இப்போது, பொதுமக்களே தங்களது வீடுகளில் உருவாகும் காய்கறிக் கழிவைக் கொண்டு இயற்கை உரம் தயாரிக்கும் வகையில் 3 மண்பானை உபகரணங்களை இலவசமாக வழங்கும் திட்டம் அறிமுகப்படுத்தப்பட்டுள்ளது. இதன் மூலமாக 45 நாள்களில் சிறந்த இயற்கை உரத்தை தயாரித்துப் பயன்படுத்த இயலும்.

 இத் திட்ட தன்னார்வப் பயனாளிகளுக்கு இந்த உபகரணங்கள் வழங்கும் நிகழ்ச்சி பேரூராட்சி அலுவலகத்தில் வியாழக்கிழமை நடைபெற்றது. செயல் அலுவலர் துவாரகநாத் சிங் முன்னிலை வகித்தார். பேரூராட்சித் தலைவர் பி.ஆர்.ஜி.அருண்குமார் தலைமை வகித்து உபகரணங்களை வழங்கினார்.

 துணைத் தலைவர் சந்திரன், கவுன்சிலர்கள் குணசேகரன், சுப்பிரமணியன், திட்ட ஒருங்கிணைப்பாளர் ரவீந்திரன், உதவித் திட்ட ஒருங்கிணைப்பாளர் விமல்குமார், மேற்பார்வையாளர் சுரேஷ், குப்புராஜ் உள்ளிட்டோர் உடனிருந்தனர்.