தினமணி 01.08.2012
பழனியில் குடிநீர் குழாய் பதிக்கும் பணி: ஜப்பான் வல்லுநர்கள் ஆய்வு
பழனி, ஜூலை 31: பழனியில் பன்னாட்டு நிதி நிறுவனத்தின் கீழ் மேற்கொள்ளப்பட்டுள்ள குடிநீர் குழாய் பதிக்கும் பணிகளை, ஜப்பான் நாட்டு திட்ட வல்லுநர்கள் செவ்வாய்க்கிழமை ஆய்வு செய்தனர்.
கடந்த சில ஆண்டுகளுக்கு முன் பாலாறு-பொருந்தலாறு அணையில் இருந்து பழனிக்கு சிமெண்ட் குழாய்கள் மூலமாக குடிநீர் கொண்டு வரும் பணிகள், தமிழ்நாடு குடிநீர் வடிகால் வாரியம் மூலம் செய்யப்பட்டு, நகராட்சிக்கு ஒப்படைக்கப்பட்டது.
இக்குழாய் வரும் வழியில் பல இடங்களில் உடைப்பு ஏற்பட்டதால், இன்று வரை முழுமையாக குடிநீரை பயன்படுத்த முடியாத நிலை, நகராட்சிக்கு நீடித்து வருகிறது.
இந்நிலையில், ஜப்பான் பன்னாட்டு நிதி நிறுவனம் மூலம் சுமார் ரூ. 21.6 கோடி மதிப்பில் பாலாறு-பொருந்தலாறு அணையில் இருந்து பழனிக்கு வரும் சிமெண்ட் குடிநீர் குழாய்களை, இரும்புக் குழாய்களாக மாற்ற திட்டங்கள் தீட்டப்பட்டு, அரசு ஒப்புதல் பெறப்பட்டு, கடந்த சில மாதங்களாக பணிகள் நடைபெற்று வருகின்றன.
இப்பணிகளை, செவ்வாய்க்கிழமை பன்னாட்டு நிதி நிறுவனத்தின் திட்ட வல்லுநர்களான மிஹிர் சோகைல், யூய் நகமுரா ஆகியோர் ஆய்வு செய்தனர்.
அதில் அவர்கள், பழனிக்கு குடிநீர் வரும் பாலாறு அணை, நீரேற்றும் நிலையம், குடிநீர் சுத்திகரிப்பு செய்யும் பகுதி மற்றும் குழாய்கள் பதிக்கும் பணிகளை பார்வையிட்டனர். நகர்மன்றத் தலைவர் வேலுமணி, துணைத் தலைவர் முருகானந்தம், நகராட்சி ஆணையர் (பொறுப்பு) கண்ணையா ஆகியோர் பணிகளை தரமாக முடிக்க, தமிழ்நாடு குடிநீர் வடிகால் வாரிய அதிகாரிகளுக்கு வலியுறுத்தினர்.
ஆய்வு குறித்து, குடிநீர் வடிகால் வாரியச் செயற்பொறியாளர் ராஜேந்திரன் கூறுகையில், தமிழகத்தில் ஜப்பான் பன்னாட்டு நிதி நிறுவனத்தின் ஒத்துழைப்பால், திருச்சி, பழனி, இடப்பாடி, குன்னூர், தேவகோட்டை மற்றும் சென்னை மாதவரம் போன்ற இடங்களில் குடிநீர் பணிகள் நடைபெற்று வருகின்றன.
மொத்த திட்ட மதிப்பீடு ரூ. 345 கோடி. பழனியில் ரூ. 21.6 கோடி மதிப்பில் நடைபெறும் இப்பணிகள் 2013 ஜூன் மாதம் நிறைவுபெறும். திருச்சியில் பணிகள் நிறைவுறும் தருவாயில் உள்ளன. பழனியில் ஆய்வுகள் இன்றுதான் துவங்கப்பட்டுள்ளன எனத் தெரிவித்தார்.
ஆய்வின்போது, தமிழ்நாடு உட்புற கட்டமைப்பு நிதி நிறுவன முதுநிலை உதவி மேலாளர் ராஜேந்திரன், துணை மேலாளர் அருண் ஜஸ்டின், குடிநீர் வடிகால் வாரிய உதவி செயற்பொறியாளர் ஜெயக்குமார், உதவிப் பொறியாளர் சிங்கராஜ் உள்ளிட்டோர் உடனிருந்தனர்.
5 நகராட்சிப் பள்ளிகளின் மேம்பாட்டுக்கு ரூ.24 லட்சம் நிதிமயிலாடுதுறை, ஜூலை 31: மயிலாடுதுறை நகராட்சி நிர்வாகத்தின் கீழ் செயல்படும் 5 நகராட்சிப் பள்ளிகளின் மேம்பாட்டுக்காகவும், அடிப்படை வசதிகளைச் செய்யவும் நகராட்சி கல்வி நிதியின் கீழ் ரூ. 24 லட்சம் ஒதுக்கீடு செய்வதற்கு நகர்மன்றக் கூட்டத்தில் தீர்மானம் நிறைவேற்றப்பட்டுள்ளது.மயிலாடுதுறை நகர்மன்றக் கூட்டம், தலைவர் எஸ். பவானி தலைமையில் செவ்வாய்க்கிழமை நடைபெற்றது. கூட்டத்தில் உறுப்பினர்கள் பேசியது:
ரமேஷ்: நகர்மன்ற உறுப்பினர்களுக்கு அடையாள அட்டை வழங்கவும், பழுதடைந்துள்ள சாலைகளை சீரமைக்கவும் நடவடிக்கை எடுக்க வேண்டும். க. ரகு: காமராஜர் பேருந்து நிலையம் அருகில் மிகப்பெரிய அளவில் நகராட்சியின் அனுமதி பெறாமல் டிஜிட்டல் பேனர்கள் வைக்கப்பட்டுள்ளன. இந்த பேனர்கள் சரிந்தால் உயிரிழப்பு ஏற்படும் என்பதால், மக்கள் அதிகம் கூடும் இடங்களில் டிஜிட்டல் பேனர் வைப்பதை தடுக்க வேண்டும்.
ராஜேந்திரன்: கச்சேரி சாலையில் மக்கள் அதிக அளவில் வந்து போவதால், இந்தப் பகுதியில் சுகாதார வளாகம் அமைத்து, நகர் தூய்மை பெற நடவடிக்கை எடுக்க வேண்டும்.
வை. தனபால்: சின்னக்கடைவீதி,மகாதானத் தெரு சந்திப்பில் டாஸ்மாக் கடை உள்ளது. அந்த வழியாகச் செல்லும் பள்ளி,கல்லூரி மாணவ-மாணவிகள், பொதுமக்களுக்கும் இடையூறு ஏற்படுவதால், கடையை அகற்றவேண்டும்.
ஜி.கோவிந்தராஜன்: சித்தர்க்காடு பகுதியில் விநியோகம் செய்யப்படும் குடிநீர் மாசடைந்து காணப்படுவதால் பொது மக்கள் நோயுறும் நிலை உருவாகியுள்ளது. கூட்ட முடிவில், மயிலாடுதுறை நகராட்சியின் கீழ் செயல்படும், திருவிழந்தூர் நகராட்சித் தொடக்கப்பள்ளியில் கூடுதல் கட்டடம் கட்டுவதற்கு ரூ. 4.50 லட்சம், கூறைநாடு கிட்டப்பா நகராட்சி மேல்நிலைப்பள்ளி கட்டடங்கள் பராமரிப்பிற்கு ரூ. 4 லட்சம், தியாகி நாராயணசாமி நகராட்சி மேல்நிலைப்பள்ளி கட்டடம் மற்றும் சுகாதார வளாகம் மற்றும் புதிய வகுப்பறைகள் கட்டுவதற்கு ரூ. 13 லட்சம், கூறைநாடு எரகாலித் தெரு நகராட்சி பள்ளி கட்டடம் பராமரிப்புக்கு ரூ. 1 லட்சம் ஆகியவை நகராட்சி கல்வி நிதியிலிருந்து ஒதுக்கீடு செய்வது உள்ளிட்ட 35 தீர்மானங்கள் நிறைவேற்றப்பட்டன.
