தினமலர் 26.05.2010
செம்மொழி மாநாட்டுக்கு கை கொடுக்குமா சிறுவாணி குடிநீர்?
கோவை : சிறுவாணி அணையில் தற்போது 20 நாட்களுக்குரிய குடிநீரே இருப்பதால், இருக்கும் தண்ணீரால் செம்மொழி மாநாட்டை சமாளிக்க முடியுமா என்ற கேள்விக்குறி, மாநகராட்சி அதிகாரிகள் மத்தியில் எழுந்துள்ளது. கோவையிலிருந்து 37 கி.மீ., தொலைவில் மேற்குத்தொடர்ச்சி மலையில் சிறுவாணி அணை உள்ளது. அணையிருக்கும் பகுதி கேரள எல்லையில் இருந்தாலும், அங்கிருந்து வழிந்தோடும் தண்ணீர் தமிழகத்திற்கே வருகிறது. அதனால், கோவை மக்களின் தாகம் தீர்க்கும் குடிநீராக பயன்படுத்தப்படுகிறது.அணையிலிருந்து தண்ணீர் எடுப்பது, சுத்திகரிப்பது போன்ற பணிகளை முழுக்க முழுக்க தமிழ்நாடு குடிநீர் வடிகால் வாரியத்தினரே செய்து வருகின்றனர். இருப்பினும், அணையின் பராமரிப்புப் பணிகளை கேரள பொதுப்பணித்துறை மேற்பார்வையில் தமிழ்நாடு குடிநீர் வடிகால் வாரியத்தினர் செய்து வருகின்றனர். இப்பணிகளை மாநகராட்சி தன்வசம் ஒப்படைக்கும் படி குடிநீர் வடிகால் வாரியத்தை கேட்டு வருகிறது. ஆனால், பொறுப்புகளை ஒப்படைக்க குடிநீர் வடிகால் வாரியம் மறுத்து வருகிறது. கடந்த ஏப்ரலில் பெய்த கோடை மழையால் அணை நிரம்பி மதகுகள் திறந்துவிடப்பட்டு, தண்ணீர் தொடர்ந்து வெளியேற்றப்பட்டது. அதன் பின், அணையின் நீர்மட்டம் உயரவும் இல்லை; அணை நிரம்பவும் இல்லை.
செம்மொழி மாநாடு கோவையில் நடைபெறுவதால் அதற்கு தேவையான குடிநீரை வழங்குவதாக கலெக்டர் உமாநாத்தும், மாநகராட்சி கமிஷனர் அன்சுல் மிஸ்ராவும் உறுதியளித்திருந்தனர். ஆனால் செம்மொழி மாநாடு நடைபெறுவதற்கு முன்பே சிறுவாணி குடிநீர் வினியோகம் நின்று விடுமோ என்ற பயம் மாநகராட்சி அதிகாரிகளை பிடித்து வாட்டிவருகிறது.
சிறுவாணி அணையில் நேற்றைய நிலவரப்படி உள்ள நீர்மட்டம் 868.30 மீட்டர். நாளொன்றுக்கு 86 எம்.எல்.டி., தண்ணீர் எடுக்கப்படுகிறது; 69 எம்.எல்.டி., குடிநீர் மாநகராட்சிக்கு உட்பட்ட மேற்கு மற்றும் தெற்கு மண்டலத்துக்கு உட்பட்ட பகுதிகளில் வினியோகிக்கப்படுகிறது. மீதமுள்ள குடிநீர் வழியோர கிராமங்களுக்கு வினியோகிக்கப்படுகிறது.அன்றாடம் 89 எம்.எல்.டி., குடிநீர் எடுப்பதால் அணையின் நீர் மட்டம் 9 செ.மீ., அளவுக்கு குறைந்து வருகிறது. கடைசியாக 863 மீட்டர் வரை தான் குடிநீர் எடுக்க முடியும். தற்போது 5 மீ., தூரத்திற்கே சிறுவாணி குடிநீர் அணையில் உள்ளது. ஒரு நாளைக்கு 9 செ.மீ., என்றால் அதிகபட்சமாக தற்போது சிறுவாணி அணையில் இருக்கும் குடிநீரை 20 நாட்கள் வரையே எடுக்க முடியும்.
அதற்கு மேல் எடுப்பதற்கு முடியாது. அப்படியே எடுத்தாலும் சேறும், சகதியுமாக இருக்கும். தண்ணீரை வாய்க்கால் வெட்டி, மோட்டார் மூலம் உறிஞ்சி எடுக்கலாம். அப்படியே எடுத்தாலும் அவை அதிகபட்சமாக ஐந்து நாட்கள் வரையே சமாளிக்கலாம். ஆனால், செம்மொழி மாநாடு கோவையில் நடப்பதற்கு இன்னும் 29 நாட்கள் இருக்கும் நிலையில் சிறுவாணி அணையில் இருக்கும் குடிநீர் அதிகபட்சமாக 25 நாட்கள் மட்டுமே பயன்படுத்த முடியும்.
அதிகாரிகள் யோசனை:பில்லூர் குடிநீரை செம்மொழி மாநாட்டிற்கு தேவையான அளவு இருப்பு வைக்கலாம் என்று அதிகாரிகள் தரப்பில் யோசித்து வருகின்றனர். பில்லூர் குடிநீர் மோட்டார் மூலம் பம்ப் செய்யப்பட்டு கோவை நகருக்கு குழாய்கள் மூலம் கொண்டுவரப்படுகிறது. அடிக்கடி ஏற்படும் மின் தடையால் குடிநீர் குழாயில் உடைப்பு ஏற்படுகிறது. பில்லூர் குடிநீர் வினியோகத்தில் ஏதேனும் பிரச்னை ஏற்பட்டால், லாரிகளில் தண்ணீரை பிடித்து வினியோகம் செய்யவும் அதிகாரிகள் முடிவு செய்துள்ளனர். தண்ணீர் பிரச்னை விஸ்வரூபம் எடுப்பதற்கு முன்பே அதிகாரிகள் விழித்துக்கொண்டால், நல்ல பெயரை கோவைக்கு பெற்றுத் தரலாம்.
