Urban News

கோவை : தனியார் வணிக வளாகத்தில் வாகன பார்க்கிங் பகுதியை ஆக்கிரமித்துள்ள கடைகளை அகற்ற, மாநகராட்சி நடவடிக்கை மேற்கொண்டுள்ளது.சாயிபாபாகாலனி, என்.எஸ்.ஆர்.,ரோடு, மணியம் வேலப்பர் வீதியில் பிரபல நகைக்கடை உள்ளது. இதன் முன்பகுதி வாகன பார்க்கிங் இடத்தில் மொபைல் போன் கடை, புத்தக கடை, பொக்கே ஷாப் உள்ளிட்ட 10க்கும் மேற்பட்ட கடைகள் அமைக்கப்பட்டிருந்தன. இதனால், வாடிக்கையாளர்கள், தங்களது வாகனங்களை சாலையோரத்தில் நிறுத்த வேண்டிய நிர்பந்தம் ஏற்பட்டது.

பார்க்கிங் பகுதியிலுள்ள கடைகளை அகற்ற, மாநகராட்சி நகரமைப்பு துறை ஏற்கனவே நோட்டீஸ் அனுப்பியிருந்தது; எனினும், கடைகள் அகற்றப்படவில்லை. இந்நிலையில், உதவி நகரமைப்பு அலுவலர் ரவிச்சந்திரன் உள்ளிட்ட அதிகாரிகள் நேற்று அதிரடி நடவடிக்கையில் இறங்கினர்.

வாகன பார்க்கிங் பகுதியில் இருந்த கடைகளை அகற்றும் நடவடிக்கையை துவக்கினர். இதையடுத்து, மாநகராட்சி கமிஷனரிடம், கடை உரிமையாளர் வேண்டுகோள் விடுத்ததன் அடிப்படையில், இடித்து அப்புறப்படுத்தும் பணி தற்காலிகமாக நிறுத்தப்பட்டது. ஒரு நாள் கால அவகாசத்தில் மீதமுள்ள பகுதியை தாங்களாகவே அகற்றிக்கொள்வதாக கடை உரிமையாளர் உறுதி அளித்துள்ளதாக, அதிகாரிகள் தெரிவித்தனர்.

இது குறித்து உதவி நகரமைப்பு அலுவலர் ரவிச்சந்திரன் கூறுகையில், ""24 மணி நேரத்தில் ஆக்கிரமிப்பு கடைகளை அகற்றிக்கொள்ளாவிடில் இடித்து அகற்றப்படும்,'' என்றார்.

தினமலர் 02.02.2010

மாநகராட்சி அதிரடி நடவடிக்கை: தினமலர் செய்தி எதிரொலி

சென்னை: தினமலர் செய்தி எதிரொலியால், தி.நகர் பகுதியில் சென்னை மேயர் அதிரடிச் சோதனை மேற்கொண்டு, சுகாதார கேடு ஏற்படுத்திய, 15 நடைபாதைக் கடைகளை அகற்றவும், மூடவும் உத்தரவிட்டார்.

"தி.நகர் சிவா - விஷ்ணு கோவில் அருகில், பக்தர்கள் முகம் சுளிக்கும் வகையில் கழிவுகள் போடப்பட்டுள்ளன' என்று, "தினமலர்' நேற்று படத்துடன் செய்தி வெளியிட்டது. அதைத் தொடர்ந்து மேயர் சுப்ரமணியன், நேற்று காலை கோடம்பாக்கம் மண்டல அலுவலர் ஞானமணியுடன் சென்று, தி.நகர் பகுதியில் திடீர் ஆய்வு செய்தார். மேட்லி சாலையில் ஐந்து துரித உணவகங்கள், நடேசன் சாலையில் நான்கு துரித உணவகங்கள், ஒரு தேநீர் விடுதி, ஒரு சிப்ஸ் கடை மற்றும் ஒரு குளிர்பானக் கடை ஆகியவைகளையும், கில்டு சாலையில் செயல்பட்ட ஒரு துரித உணவகமும், முத்துரங்கன் சாலையில் இரண்டு துரித உணவகங் களும் நடைபாதைகளை ஆக்கிரமித்து இருப்பதை அறிந்து, உடனடியாக அந்த கடைகளை அகற்ற, மண்டல அலுவலருக்கு உத்தரவிட்டார். மேலும், இறைச்சிக் கழிவுகளை போட்டு, சுகாதார கேடு ஏற்படுத்தியதோடு, போக்குவரத்து இடையூறும் ஏற்படுத்தியதற்காக, அந்த கடைகளை மூடும்படி, மேயர் உத்தரவிட்டார். கில்டு சாலையில் குவிந்திந்த குப்பைகள் மற்றும் கழிவுகள், மேயர் முன்னிலையிலேயே அகற்றப்பட்டன.