Urban News

ராஜபாளையம், ஜன. 31: ராஜபாளையம் அருகே அரசு புறம்போக்கு இடத்தில் ஆக்கிரமித்து அமைக்கப்பட்ட குடிசை வீடுகள் ஞாயிற்றுக்கிழமை அகற்றப்பட்டன.

ராஜபாளையம் அருகேயுள்ள தென்றல் நகர் பகுதியில் அரசு புறம்போக்கு நிலம் உள்ளது. இந்த இடத்தை இப்பகுதியைச் சேர்ந்தவர்கள் ஆக்கிரமித்து, 20-க்கும் மேற்பட்ட குடிசை வீடுகளை அமைத்திருந்தனர். இந்த ஆக்கிரமிப்புகளை ராஜபாளையம் வட்டாட்சியர் சங்கரநாராயணன், டி.எஸ்.பி. முருகேசன் மற்றும் அரசு அலுவலர்கள் ஞாயிற்றுக்கிழமை அகற்றினர்.

இப்பகுதியை மீண்டும் ஆக்கிரமித்தால் கடும் நடவடிக்கை எடுக்கப்படும் என எச்சரித்தனர்.

அரசிடம் முறைப்படி மனு செய்து, அனுமதி கிடைத்தால் இப்பகுதியில் வீடு கட்டலாம் என அதிகாரிகள் தெரிவித்தனர்.

பழனி ஜன.31: பழனி நகரில் மரங்களில் மேல் வைக்கப்பட்டிருந்த விளம்பரப் பதாகைகள்,தனியார் தொண்டு நிறுவனம் மூலம் நகராட்சி, நெடுஞ்சாலைத்துறையினர் ஒப்புதலின்பேரில் அகற்றப்பட்டன.

பழனி நகரில் சாலை ஓரங்களில் இருந்த மரங்களில், பல்வேறு நிறுவனத்தினரும் தங்களது விளம்பரங்களை ஆணியால் அறைந்தும், கம்பியால் கட்டியும் தொங்க விட்டிருந்தனர்.

இந்நிலையில், இந்த மரங்களைக் காக்க, பாலசமுத்திரம் விவேகானந்தா சேவா டிரஸ்ட் விளம்பரங்களை அகற்ற முன் வந்தது.

இதுதொடர்பாக, நகராட்சி மற்றும் நெடுஞ்சாலைத் துறைக்கு டிரஸ்ட் சார்பில் அனுப்பப்பட்ட விண்ணப்பம் ஏற்கப்பட்டது.

இதனையடுத்து, பழனியாண்டவர் கலைக் கல்லூரி முதல் பஸ் நிலையம் வரையில், சாலையோர மரங்களில் உள்ள அட்டைகள் மற்றும் போர்டுகள் நீக்கப்பட்டு அவை, நகராட்சி மற்றும் நெடுஞ்சாலைத் துறையினரிடம் ஒப்படைக்கப்பட்டது.

விரைவில் ஆர்.எப். சாலை மற்றும் புது தாராபுரம் சாலையில் மரங்களில் உள்ள விளம்பரங்கள் அகற்றப்படும் எனத் தெரிகிறது.