Urban News

சங்கரன்கோவில், ஏப். 15: சங்கரன்கோவிலில் நவீன ஆடு அறுப்புக் கூடம் திறப்பு விழா வியாழக்கிழமை நடைபெற்றது.

புதிய பஸ்நிலையம் அருகில் ரூ.20 லட்சம் செலவில் நவீன ஆடு அறுப்புக் கூடம் கட்டப்பட்டுள்ளது. இதனை நகராட்சித் தலைவர் பார்வதிசங்கர் திறந்து வைத்தார்.பின்னர் அவர் செய்தியாளர்களிடம் கூறியதாவது:

சங்கரன்கோவிலில் சுகாதாரத்தை மேம்படுத்துவதற்காக ஆடு அறுப்புக் கூடம் திறந்து வைக்கப்பட்டுள்ளது. இனி ஆடுகளை சாலையில் அறுக்கக் கூடாது.

கால்நடைமருத்துவர் பரிசோதனைக்குப் பின்னரே ஆடுகள் அறுக்கப்படும். இதற்காக கால்நடை மருத்துவர் நியமிக்கப்பட்டுள்ளார்.

சோலார் மூலம் இந்த ஆடு அறுப்புக் கூடம் நவீனப்படுத்தப்பட்டுள்ளது. கறிகளை கழுவுவதற்கு சுடுதண்ணீர் வசதியும் செய்யப்பட்டுள்ளது.

இறைச்சிக் கடைகளை ஒரே இடத்தில் அமைக்க இடம் தேர்வு செய்யப்பட்டு வருகிறது. ஆடு அறுப்பதற்கான கூலி தொடர்பாக, நகராட்சி கூட்டத்தில் உறுப்பினர்களின் ஆலோசனையைப் பெற்று முடிவு எடுக்கப்படும் என்றார் அவர்.

இந்நிகழ்ச்சியில் முன்னாள் அமைச்சர் ச.தங்கவேலு, நகராட்சித் துணைத் தலைவர் சங்கரன், சுகாதார அதிகாரி குருசாமி, ஓவர்சியர் பட்டுராஜ், நகராட்சி உறுப்பினர் நடராஜன், முகம்மதுஅலிஜின்னா, சங்கரமகாலிங்கம் உள்ளிட்ட பலர் பங்கேற்றனர்.

நாகர்கோவில், ஏப். 15: வெள்ளிமலை பேரூராட்சி அம்மாண்டிவிளை அருகே கருங்காலிவிளையில் ரூ. 2 லட்சத்தில் அமைக்கப்பட்டுள்ள கலையரங்கை எஸ். ஜெயபால் எம்எல்ஏ திறந்துவைத்தார்.

குளச்சல் எம்எல்ஏ தொகுதி மேம்பாட்டு நிதியிலிருந்து இந்தக் கலையரங்கு கட்டப்பட்டுள்ளது.

இதன் திறப்பு விழாவில் பேரூர் காங்கிரஸ் தலைவர் தேவராஜ், வட்டார காங்கிரஸ் தலைவர் முருகன், கவுன்சிலர் சரோஜா, திமுக பிரதிநிதி பொன்னுலிங்கம், ஊர்த் தலைவர் அரிகிருஷ்ணன்ராஜா, ஆசாரிப்பள்ளம் பேரூராட்சித் தலைவர் வில்லியம், நகரத் தலைவர் விஜிலியஸ் உள்ளிட்டோர் பங்கேற்றனர்.