தினமலர் 24.12.2010
மாநராட்சி பகுதி வாக்காளர் பட்டியல்; கலெக்டர் ஆய்வு
திருச்சி: திருச்சி மாநகராட்சிப் பகுதியில் மேற்கொள்ளப்படும் வாக்காளர் பட்டியல் தொடர்பான பணிகளை கலெக்டர் மகேசன் காசிராஜன் பார்வையிட்டு ஆய்வு செய்தார்.
நடக்கவுள்ள சட்டசபைத் தேர்தலுக்கான வாக்காளர் பட்டியலில் பெயர் சேர்க்க, நீக்கம் செய்ய பெற்ற படிவங்களின் பேரில், மேற்கொள்ளப்பட்ட முழு நடவடிக்கை, நீக்கம் செய்ய வரப்பெற்ற படிவங்கள் பேரில் சம்பந்தப்பட்ட மனுதாரர்களுக்கு சார்பு செய்யப்பட்ட அறிவிப்பு. வாக்காளர்களுக்கு உரிய ஃபோட்டோவுடன் கூடிய அடையாள அட்டை முழுமையாக சம்பந்தப்பட்ட வாக்காளரின் கையெழுத்துடன் வழங்கிய விபரம் ஆகியவற்றை, திருச்சி மேற்கு, திருச்சி கிழக்கு சட்டசபைத் தொகுதிகளுக்கு உண்டான பணிகளை மாநகராட்சி அலுவலகத்தில், திருச்சி கலெக்டர் மகேசன் காசிராஜன் பார்வையிட்டு ஆய்வு செய்தார். திருத்தியமைக்கப்பட்ட ஓட்டுச்சாவடிகளின் படி, ஓட்டுச்சாவடிகளை நேரில் பார்வையிடும் வகையில், திருச்சி மேற்கு சட்டசபைத் தொகுதிக்கு உட்பட்ட சேவா சங்கம் பெண்கள் மேல்நிலைப்பள்ளியில் உள்ள ஐந்து ஓட்டுச்சாவடிகளை நேரில் பார்வையிட்டு ஆய்வு செய்தார். மாநகராட்சி கமிஷனர் பால்சாமி, தேர்தல் தாசில்தார் உமாபதி உடனிருந்தனர்.
