தினமணி 02.03.2013
குடிநீர் கட்டணம் செலுத்தாத இணைப்புகள் துண்டிப்பு
குடிநீர் கட்டணம் செலுத்தாத இணைப்புகளைத் துண்டித்திட, பொள்ளாச்சி நகர்மன்றக் கூட்டத்தில் தீர்மானம் நிறைவேற்றப்பட்டது.
நகர்மன்ற உறுப்பினர்கள் கூட்டம் தலைவர் வி.கிருஷ்ணகுமார் தலைமையில் வெள்ளிக்கிழமை நடைபெற்றது. நகராட்சிக்கு உள்பட்ட பகுதியில் 13 ஆயிரத்து 400 குடிநீர் இணைப்புகள் உள்ளன. இதில் நீண்ட நாள்களாக குடிநீர் கட்டணம் செலுத்தாமல் உள்ள இணைப்புகள் குறித்து நகராட்சி வருவாய் ஆய்வாளர்கள் கொண்ட குழு அமைக்கப்பட்டு ஆய்வு மேற்கொள்ளப்பட்டது.
இதில் குடிநீர் இணைப்பு உள்ள எண்களில் இணைப்புதாரரின் பெயர் மற்றும் முழுமையான முகவரி மற்றும் குடியிருப்புகள் இல்லாதது தெரியவந்தது. நகராட்சிக்கு செலுத்த வேண்டிய குடிநீர் கட்டணம் ரூ. 3 லட்சத்து 20 ஆயிரம் நிலுவையில் உள்ளது.
இந்தத் தொகை நகராட்சி வசூலிக்க முடியாதவை என்பதால், தொகையை தள்ளுபடி செய்து தீர்மானம் நிறைவேற்றப்பட்டது. மேலும் இந்தக் குடிநீர் இணைப்புகள் அனைத்தையும் உடனடியாக துண்டித்திட தீர்மானம் நிறைவேற்றப்பட்டது.
2012-13 ஆம் ஆண்டுக்கான திருத்திய வரவு, செலவு அறிக்கை மற்றும் 2013-14 ஆம் ஆண்டுக்கான பயன்பாட்டு வரவு, செலவு அறிக்கை தாக்கல் செய்யப்பட்டது. இந்தத் தீர்மானங்கள் அனைத்து உறுப்பினர்களின் ஆதரவுடன் நிறைவேற்றப்பட்டன.
