தினத்தந்தி 03.07.2013
கோவை மாநகராட்சி குப்பை கிடங்கில் கொட்டுவது அம்பலம்: கேரளாவிலிருந்து மருத்துவ கழிவுகள் ஏற்றி வந்த லாரி சிறைப்பிடிப்பு; பொதுமக்கள் போலீசில் ஒப்படைத்தனர்
கேரளாவிலிருந்து மருத்துவ கழிவுகள் ஏற்றி வந்த லாரியை பொது மக்கள் சிறை பிடித்து போலீசில் ஒப்படைத்தனர்.
தமிழகத்தில் கொட்டப்படும் கழிவுகள்
கேரளாவில் உள்ள ஆஸ்பத்திரிகளில் சேகரிக்கப்படும் மருத்துவ கழிவுகள், தொழிற்சாலைகளிலிருந்து வெளியேற்றப்படும் ரசாயன கழிவுகள் லாரிகளில் ஏற்றப்பட்டு கோவைக்கு கொண்டு வந்து இரவு நேரங்களில் யாருக்கும் தெரியாமல் கொட்டப்படும் சம்பவங்கள் கடந்த சில ஆண்டுகளாக தொடர்ந்து நடந்து வருகின்றது. தமிழகத்திலிருந்து கேராளவுக்கு சரக்குகளை ஏற்றி செல்லும் லாரிகள் அங்கிருந்து திரும்பும் போது கழிவுகளை அதிக வாடகைக்கு பேசி ஏற்றிக்கொண்டு வந்து கோவையில் கொட்டி விட்டு சென்று விடுகின்றன. இதற்கு அனைத்து தரப்பிலிருந்தும் எதிர்ப்பு கிளம்பியதால் கடந்த சில மாதங்களாக மருத்துவ கழிவுகள் தமிழக எல்லைக்குள் கொட்டப்படுவது நிறுத்தப்பட்டது.
இந்த நிலையில் நேற்று அதிகாலை கோவை நகரை அடுத்த வெள்ளலூர் குப்பை கிடங்குக்கு வெளியே ஒரு லாரி நின்றிருந்தது. அதிகாலை நேரத்தில் அந்த வழியாக நடைபயிற்சிக்கு சென்றவர்கள் அந்த லாரியிலிருந்து வெளியேறிய துர்நாற்றத்தினால் மிகவும் பாதிக்கப்பட்டனர். இவ்வளவு நாற்றத்துடன் அந்த லாரியில் என்ன ஏற்றிப்பட்டிருக்கிறது என்று தெரிந்து கொள்வதற்காக அந்த பகுதி மக்கள் லாரி டிரைவரிடம் விசாரித்தனர்.
கழிவுகள் ஏற்றி வந்த லாரி
இதில் அவருடைய பெயர் குப்புசாமி (வயது 35) என்றும், சேலத்தை சேர்ந்தவர் என்றும் தெரியவந்தது. அவர் தான் அந்த லாரியின் உரிமையாளரும், டிரைவராகவும் உள்ளார் என்பது தெரியவந்தது. அவரிடம் விசாரித்ததில் கோவை கணபதியை சேர்ந்த ராஜன் (40) என்பவர் தான் இதை கேரளாவிலிருந்து ஏற்றி வர சொன்னார் என்றும் வெள்ளலூர் குப்பை கிடங்கு காவலாளியிடம் அவர் ஏதோ பேசியதாகவும் ஆனால் அதற்கு அவர் ஒப்புக் கொள்ளாததால் காலையில் வருவதாகவும் சொல்லி விட்டு சென்றதாகவும் கூறினார்.
அந்த லாரியிலிருந்து கடுமையான நாற்றம் அடித்ததால் அதில் மருத்துவ கழிவுகள் ஏற்றப்பட்டிருக்கலாம் என்று நினைத்த அந்த பகுதியை சேர்ந்த சுமார் 200 பேர் அந்த லாரியை முற்றுகையிட்டனர். இதனால் அதிகாலை நேரத்தில் அங்கு பரபரப்பு ஏற்பட்டது.
போத்தனூரிலும் நாற்றம்
இது பற்றிய தகவல் போத்தனூர் போலீசாருக்கு தெரிவிக்கப்பட்டது. அதன்பேரில் போலீசார் சம்பவ இடத்துக்கு விரைந்து சென்று விசாரித்தனர். அதன் பின்னர் அந்த லாரியை போலீசார் போத்தனூர் போலீஸ் நிலையத்துக்கு கொண்டு வந்து நிறுத்தினார்கள். லாரியை அங்கு கொண்டு வந்து நிறுத்தியதும் அதிலிருந்து கிளம்பிய நாற்றத்தினால் அந்த பகுதி மக்கள் வீட்டு ஜன்னல்கள் மற்றும் கதவுகளை மூடிக்கொண்டனர். ஆனால் சாலையில் நடந்து செல்பவர்களை மூச்சு முட்டும் அளவுக்கு நாற்றம் துளைத்தெடுத்தது.
மருத்துவ கழிவுகளை ஏற்றி வருவதற்கு உதவிய ராஜன் என்பவர் புரோக்கராக செயல்பட்டுள்ளார். அவருடைய ஏற்பாடடின்பேரில் தான் கேரளாவிலிருந்து மருத்துவ கழிவுகள் கோவைக்கு ஏற்றி கொண்டு வரப்பட்டுள்ளது போலீசாரின் விசாரணையில் தெரியவந்துள்ளது. அவரை போலீசார் தீவிரமாக தேடி வருகிறார்கள். அவருடைய செல்போன் தொடர்பு கிடைக்கவில்லை.
போராட்டம்
இது குறித்து வெள்ளலூர் பகுதி பொதுமக்கள் கூறியதாவது:–
கேரளாவிலிருந்து மருத்துவ கழிவுகளை லாரிகளில் ஏற்றி வந்து கோவை பகுதியில் கொண்டு வந்து கொட்டுவது வாடிக்கையாகி விட்டது. இது தொடர்பாக மாசு கட்டுப்பாட்டு வாரிய அதிகாரிகள் உரிய நடவடிக்கை எடுக்க வேண்டும். மேலும் கழிவுகளை ஏற்றி வரும் லாரிகளை அப்படியே திருப்பி அனுப்பாமல் அந்த லாரி உரிமையாளர்கள் மீதும், சரக்கை அனுப்பிய கேரள ஆஸ்பத்திரி மற்றும் தொழிற்சாலைகள் மீதும் கிரிமினல் நடவடிக்கை எடுக்க வேண்டும். சுற்றுசூழலுக்கு பாதிப்பை ஏற்படுத்தும் இத்தகைய செயல்களில் ஈடுபடுபவர்கள் மீது கடுமையான நடவடிக்கை எடுக்க வேண்டும். இல்லையென்றால் மிகப்பெரிய அளவில் போராட்டம் நடத்தப்படும். இவ்வாறு அவர்கள் கூறினார்கள்.
