Urban News

திருச்சி, ஜூன் 21: திருச்சி மாநகரில் ரூ. 169 கோடியில் மேற்கொள்ளப்பட்டு வரும் குடிநீர் மேம்பாட்டுத் திட்டத்தின் கீழ், பிரதான தண்ணீர் சேகரிக்கும் கிணற்றில் பக்கவாட்டு நீர்வரத்துக் குழாய் பதிக்கும் பணியை மாநகராட்சி மேயர், ஆணையர் ஆகியோர் திங்கள்கிழமை ஆய்வு செய்தனர்.

மாநகராட்சிக்கு உள்பட்ட அனைத்துப் பகுதிகளிலும் வசிக்கும் மக்களுக்கு சீரான குடிநீர் விநியோகம் செய்யும் வகையில், தமிழ்நாடு நகர்ப்புற உள் கட்டமைப்பு நிதி சேவை நிறுவனம் மூலம் ஜப்பான் நிதி நிறுவனத்தின் நிதி உதவி, மாநில அரசின் மானியத் தொகை, மாநகராட்சியின் பங்களிப்பு ஆகியவற்றைச் சேர்த்து, ரூ. 169 கோடியில் 8 தொகுப்புகளாகப் பிரித்து குடிநீர் மேம்பாட்டுத் திட்டப் பணிகள் மேற்கொள்ளப்பட்டு வருகின்றன.

இதன் ஒரு பகுதியாக ஸ்ரீரங்கம் மேலூர் பகுதியில் கொள்ளிடம் ஆற்றில் 3 இடங்களில் பிரதான தண்ணீர் சேகரிக்கும் கிணறு, 2 தரைமட்ட நீர்த்தேக்கத் தொட்டிகள், 35 இடங்களில் மேல்நிலை நீர்த்தேக்கத் தொட்டிகள் அமைக்கப்படுகின்றன. மேலும், 88.59 கிலோ மீட்டர் தொலைவுக்கு பிரதான, கிளை குடிநீர் உந்து குழாய், 262.08 கிலோ மீட்டர் தொலைவுக்கு குடிநீர் விநியோகக் குழாய், 446 கிலோ மீட்டர் தொலைவுக்கு ஏற்கெனவே பதிக்கப்பட்டு பழுதடைந்த குடிநீர்க் குழாய்களை மாற்றியமைத்தல் ஆகிய பணிகள் மேற்கொள்ளப்பட்டு வருகின்றன.

இதில், ஸ்ரீரங்கம் மேலூர் பகுதியில் கொள்ளிடம் ஆற்றில் மேற்கொள்ளப்பட்டு வரும் பிரதான தண்ணீர் சேகரிக்கும் மூன்றாவது கிணற்றில் ஓரடி சுற்றளவு கொண்ட பக்கவாட்டு தண்ணீர் வரத்து குழாய்கள் ஒவ்வொன்றும் 120 அடி ஆழத்துக்கு இரு வரிசைகளாக தலா 11 திசைகளில் பதிக்கும் பணி திங்கள்கிழமை தொடங்கப்பட்டது.

இந்தப் பணிகளை மேயர் எஸ். சுஜாதா, ஆணையர் த.தி. பால்சாமி ஆகியோர் திங்கள்கிழமை ஆய்வு செய்தனர். இந்தப் பணிகளின் முன்னேற்றம் குறித்து வாராந்திர அறிக்கை அளிக்குமாறும், நிர்ணயிக்கப்பட்ட காலகட்டத்துக்குள் முடிக்குமாறும் பொறியாளர்கள், ஒப்பந்ததாரர்களுக்கு அறிவுறுத்தினர்.

அப்போது நகரப் பொறியாளர் எஸ். ராஜா முகமது, உதவி நிர்வாகப் பொறியாளர் என். பாலகுருநாதன் உள்ளிட்டோர் உடனிருந்தனர்.

ஓசூர் புது பஸ்ஸ்டாண்ட் கட்டுமானப்பணி: அரசு செயலர் திடீர் ஆய்வு

ஓசூர்: ஓசூரில், புதுபஸ்ஸ்டாண்ட் கட்டுமான பணியை இன்று(ஜூன் 22) ஆய்வு செய்ய வருவதாக இருந்த தமிழக உள்ளாட்சி துறை செயலர் நிரஞ்சன் மார்ட்டி, யாருக்கும் தெரியாமல் நேற்று இரவோடு இரவாக வந்து ஆய்வு செய்ததால், பரபரப்பு ஏற்பட்டது. தொழில்நகரமான ஓசூரில் பெங்களூரு நான்கு வழிச்சாலையில் 10 கோடி ரூபாய் மதிப்பீட்டில் ஹைடெக் மாடலில் புதுபஸ்ஸ்டாண்ட் கட்டப்பட்டுள்ளது. கட்டுமான பணி முடிந்த நிலையில் பஸ்ஸ்டாண்ட்டை திறக்க தேதி தருமாறு நகராட்சி நிர்வாகம் தமிழக அரசுக்கு அறிக்கை அனுப்பியது. இதையடுத்து, தமிழக உள்ளாட்சி துறை செயலர் நிரஞ்சன் மார்ட்டி இன்று(ஜூன்22ம்தேதி) வந்து பஸ்ஸ்டாண்ட் பணிகளை ஆய்வு செய்து பஸ்ஸ்டாண்ட் திறப்பு விழா குறித்து தேதி அறிவிப்பதாக இருந்தது. இதுகுறித்து நகராட்சி நிர்வாகம் மூலம் அனைத்து கவுன்சிலர்கள், அதிகாரிகள் மற்றும் பத்திரிகையாளர்களுக்கு நேற்று காலை தகவல் தெரிவிக்கப்பட்டது. இந்நிலையில் தமிழக உள்ளாட்சி துறை செயலர் நிரஞ்சன் மார்ட்டி, குடிநீர் வடிகால்துறை சேர்மன் ககன்தீப் சிங் பேடி, தமிழக நகராட்சி நிர்வாக இயக்குனர் செந்தில்குமார் மற்றும் உள்ளாட்சி துறை உயர் அதிகாரிகள் அடங்கிய குழுவினர், நேற்று இரவு 9.30 மணிக்கே ஓசூர் வந்தனர். உடனே, அவர்கள் யாருக்கும் தகவல் தெரிவிக்காமல் பஸ்ஸ்டாண்ட் பணிகளை இரவே ஆய்வு செய்ய தனியாக சென்றனர்.

தகவல் அறிந்த நகராட்சி கமிஷனர் பன்னீர் செல்வம், நகராட்சி தலைவர் சத்யா, துணை தலைவர் மாதேஸ்வரன் ஆகியோர் உடனே பஸ்ஸ்டாண்ட் வந்தனர். பஸ்ஸ்டாண்ட்டை முழுவதுமாக சுற்றிபார்த்த நிரஞ்சன்மார்ட்டி, பஸ்ஸ்டாண்ட் குறுகலாக இருப்பதாகவும், எதிர்காலத்தில் போக்குவரத்து நெரிசலை தவிர்க்கும் வகையில் பஸ்ஸ்டாண்ட்டை விரிவுப்படுத்த வேண்டும் என அதிகாரிகளுக்கு ஆலோசனை வழங்கினார். பின்னர் அவர் நிருபர்களிடம் கூறுகையில், ""பஸ்ஸ்டாண்ட்டின் இறுதிகட்ட வடிவமைப்பு பணிகள் முடிய இன்னும் பத்து நாள் தேவைப்படுகிறது. தற்போது வரை முடிந்த பணிகளை ஆய்வு செய்தில் பணிகள் தரமாகவும், திருப்திகரமாகவும் உள்ளது. பஸ்ஸ்டாண்ட் திறப்பு விழா தேதி குறித்து முதல்வர், துணை முதல்வரிடம் ஆலோசித்து பின் அறிவிக்கப்படும். போக்குவரத்து நெரிசலை கருத்தில் கொண்டு பஸ்ஸ்டாண்ட் விரைவில் திறக்க நடவடிக்கை எடுக்கப்படும், '' என்றார்.

பஸ்ஸ்டாண்ட் பணியை யாருக்கும் தகவல் தெரிவிக்காமல் இரவோடு இரவாக உள்ளாட்சி துறை செயலர் ஆய்வு செய்தால், நகராட்சி அதிகாரிகள் மத்தியில் பரபரப்பு ஏற்பட்டது.