Urban News

தனியார் வாகன நிறுத்தங்களை கட்டுப்படுத்த மாநகராட்சி திட்டம்

சென்னை: நகரிலிருக்கும் தனியார் வாகன நிறுத்தும் இடங்களில் கட்டணம் வசூலிக்கப்படுவதை முறைப்படுத்த மாநகராட்சி திட்டமிட்டுள்ளது. நகரில் பல இடங்களில், தனியார் வாகன நிறுத்தும் இடங்கள் உள்ளது.

இங்கு நிறுத்தப்படும் வாகனங்களுக்கு இடத்திற்கு ஏற்றார் போல் கட்டணம் வசூல் செய்வது, அளவுக்கு அதிகமாக கட்டணம் வசூல் செய்வது, அடிக்கடி வாகனம் காணாமல் போவது, போக்குவரத்திற்கு இடையூறு ஏற்படும் வகையில் வாகனங்களை நிறுத்துவது போன்ற புகார்கள், மாநகராட்சிக்கு வந்த வண்ணம் இருந்தது. தனியார் வாகன நிறுத்தும் இடங்களில் வாகனங்கள் காணாமல் போனால் கூட சம்பந்தப்பட்டவர்கள் மீது புகார் செய்ய முடியாத நிலை இருந்து வந்தது. இதனால், நகரிலுள்ள தனியார் வாகன நிறுத்தும் இடங்கள் முறைப்படுத்தப்படும் என்று மேயர் சுப்ரமணியன் அறிவித்தார். அதன்படி, மாநகராட்சியின் வருவாய் துறையினர் ஆய்வு செய்ததில், நகரில் 180 இடங்களில் சிறிய, பெரிய தனியார் வாகன நிறுத்தும் இடங்கள் இருப்பது கண்டறியப்பட்டது. இந்த வாகன நிறுத்தும் இடங்கள் அனைத்திலும், ஒரே சீரான கட்டணம் வசூல் செய்வது, வாகனங்களை பாதுகாப்பாக வைப்பது, போக்குவரத்திற்கு இடையூறு இல்லாத வகையில் வாகன நிறுத்தம் செய்வது குறித்து மாநகராட்சி ஆலோசித்து, வரும் மாநகராட்சி மன்றக் கூட்டத்தில் தீர்மானம் நிறைவேற்றப்பட்டு, தனியார் வாகன நிறுத்தங்கள் முறைப்படுத்த நடவடிக்கை மேற்கொள்ளப்படுமென்று கமிஷனர் ராஜேஷ் லக்கானி கூறினார்.

தூத்துக்குடி, ஜூன் 7: தூத்துக்குடி மாவட்டத்தில் அரசு அனுமதி பெறாமல் வீட்டுமனைகளை விற்பவர்கள் மீது கடும் நடவடிக்கை எடுக்கப்படும் என கலெக்டர் பிரகாஷ் எச்சரித்துள்ளார்.

இதுகுறித்து அவர் விடுத்துள்ள செய்திக்குறிப்பு:

தூத்துக்குடி மாவட்டத்தில் பல்வேறு பகுதிகளில் முறையான அனுமதிபெறாமல் சட்டவிரோதமாக வீட்டுமனைகள் விற்கப்படுகின்றன. மனைகள் விற்பனை செய்யும் முன் நகர்ப்புற ஊரமைப்பு துறையின் தொழில்நுட்ப அனுமதியுடன், சம்பந்தபட்ட பஞ்சாயத்து அனுமதியும் பெறவேண்டும்.

மேலும் மனைபிரிவு அமைக்கும் இடத்தின் மொத்த பரப்பளவில் 10 சதவீத இடத்தை பாதை நீங்கலாக பொதுக்காரியங்களுக்காக பஞ்சாயத்தாரிடம் ஒப்படைக்கவேண் டும். இந்த அரசு உத்தரவை மீறி நிலத்தை விற்பனை செய்தவர்களுக்கு பஞ்சாயத்து மூலம் கட்டிட வரை பட அனுமதியும், குடிநீர் இணைப்பு மற்றும் சாலை உள்ளிட்ட அடிப்படை வசதிகள் செய்து தரமுடியாது.

நகர்ப்புற ஊரமைப்பு துறையின் தொழில்நுட்ப அனுமதியும், ஊராட்சி நிர்வாக அனுமதியும் பெற்ற வீட்டுமனைகளில் பஞ்சாயத்துக்கு ஒதுக்கப்பட்ட பகுதி நிலங்கள் மறுபடியும் மாற்றி மோசடியாக விற்கப்படுகிறதா? என்பது உள்ளிட்ட விபரங்களை வீட்டுமனை விற்பவர்களிடம் பெற்று அவை சட்டப்படியானதா என்பதையும் உறுதிப்படுத்தி வீட்டுமனைகளை பதிவு செய்யவேண்டும்.

மனைகளை விற்கும் போது நகர்ப்புற ஊரமைப்புத்துறை மற்றும் பஞ்சாயத்து அனுமதி பெறாமல் விற்பனை செய்பவர்கள் மீது கடும் நடவடிக்கை எடுக்கப்படும். இவ்வாறு அதில் கூறப்பட்டுள்ளது.