Urban News

தினத்தந்தி       05.06.2013

அம்மா உணவகத்தில் கூட்டம் அலைமோதியது போலீஸ் பாதுகாப்புடன் உணவு வினியோகம் ரூ.43 ஆயிரத்துக்கு விற்பனை

வேலூர் மாநகராட்சி பகுதியில் திறக்கப்பட்ட 10 அம்மா உணவகங்களிலும் நேற்றும் கூட்டம் அலைமோதியது. நேற்று 15,141 இட்லிகள் விற்பனை ஆனது. மொத்தம் ரூ.43 ஆயிரத்து 289 வசூல் ஆனது.

அம்மா உணவகங்கள்

வேலூர் மாநகராட்சியில் வேலூர் எம்.எல்.ஏ. அலுவலகம் அருகிலும், சத்துவாச்சாரி பீடி தொழிலாளர் குடியிருப்பு, கலெக்டர் அலுவலகம் எதிரில் உள்பட 10 இடங்களில் அம்மா உணவகம் திறக்கப்பட்டுள்ளது. அம்மா மலிவு விலை உணவகங்களில் காலை 7 மணி முதல் 10 மணிவரை ஒரு ரூபாய்க்கு இட்லியும் மதியம் 12 மணி முதல் 3 மணி வரை ரூ.5–க்கு சாம்பார் சாதம், ரூ.3–க்கு தயிர் சாதம் விற்பனை செய்யப்படுகிறது.

கூட்டம் அலைமோதியது

நேற்று காலை 10 உணவகங்களிலும் நேற்று காலை டோக்கன் பெற கூட்டம் அலைமோதியது. டோக்கன் வழங்கப்பட்ட ஒரு மணி நேரத்தில் அனைத்து இட்லிகளும் விற்று தீர்ந்தன. அதேபோல் பகல் 12 மணிக்கு அனைத்து உணவகத்திலும் சாம்பார், தயிர் சாதங்கள் 2 மணிக்குள் விற்று தீர்ந்தன. நேற்று காலை எம்.எல்.ஏ. அலுவலகம் அருகில் உள்ள அம்மா உணவகத்தில் டோக்கன் வாங்க பொதுமக்கள் முண்டியடித்து சென்றனர்.

அதைத்தொடர்ந்து பகலில் 12–15 மணி முதல் சாம்பார், தயிர் சாதங்கள் விற்பனை நடந்தது. நீண்ட வரிசையில் பொதுமக்கள் நின்றிருந்தனர். இதனால் தெற்கு மற்றும் மகளிர் போலீசார் அங்கு வந்து பொதுமக்களை முண்டியடித்து செல்லாமல் 10, 10 பேராக உள்ளே செல்ல அனுமதித்தனர். மேலும் கவுன்சிலர் துரையரசன், துப்புரவு ஆய்வாளர் லூர்துசாமி ஆகியோரும் பொதுமக்களை வரிசையில் நிற்க வைத்தனர்.

ரூ.43 ஆயிரம் வசூல்

நேற்று 15 ஆயிரத்து 141 இட்லியும், 4 ஆயிரத்து 6 சாம்பார் சாதம், 2 ஆயிரத்து 706 தயிர் சாதமும் விற்பனை செய்யப்பட்டன. இதன்மூலம் ரூ.43 ஆயிரத்து 289 வசூல் ஆனது. மாநகராட்சி கமிஷனர் ஜானகி கூறுகையில், ‘அம்மா உணவகத்தில் தனியார் அனைத்து டோக்கன்களையும் வாங்கி வினியோகிப்பதாக கூறப்படுகிறது. அதனால் அங்குள்ள மகளிர் சுயஉதவிக்குழுவினருக்கு மொத்த டோக்கன்களையும் கொடுக்க கூடாது என்று கண்டிப்பாக உத்தரவிடப்பட்டுள்ளது‘ என்றார்.

தினத்தந்தி       05.06.2013

ஈரோடு ஆர்.என்.புதூர் அம்மா உணவகத்தில் அமைச்சர் கே.வி.ராமலிங்கம் திடீர் ஆய்வு

ஈரோடு ஆர்.என்.புதூரில் உள்ள அம்மா உணவகத்தில் அமைச்சர் கே.வி.ராமலிங்கம் திடீரென்று ஆய்வு செய்தார்.

‘அம்மா உணவகம்’

ஈரோடு மாநகராட்சியில் 10 இடங்களில் ‘அம்மா உணவகங்கள்’ தொடங்கப்பட்டு உள்ளன. இந்த உணவகங்களுக்கு பொதுமக்கள் மத்தியில் அமோக வரவேற்பு ஏற்பட்டு உள்ளது. காலையில் உணவகங்கள் திறந்தது முதல் மூடும் வரை மக்கள் கூட்டம் நிரம்பி வழிகிறது.

பொதுமக்களுக்கு தரமான உணவை வழங்கும் வகையில் மாநகராட்சி அதிகாரிகள் மற்றும் மக்கள் பிரதிநிதிகள் தொடர்ந்து ஆய்வுகள் மேற்கொண்டு வருகிறார்கள்.

அமைச்சர் திடீர் ஆய்வு

இந்த நிலையில் நேற்று ஆர்.என்.புதூரில் உள்ள அம்மா உணவகத்தில் அமைச்சர் கே.வி.ராமலிங்கம் திடீர் ஆய்வு மேற்கொண்டார். உணவகத்துக்குள் சென்று உணவக அமைப்பை பார்வையிட்டார். மேலும் அங்கு விற்பனைக்காக வைக்கப்பட்டு இருந்த இட்லியை கேட்டு வாங்கி சாப்பிட்டு ருசி பார்த்தார். அப்போது அவர் இட்லி நன்றாக இருப்பதாக கூறினார்.

இந்த ஆய்வின் போது ஈரோடு மாவட்ட கலெக்டர் சண்முகம், மேயர் மல்லிகா பரமசிவம், துணை மேயர் கே.சி.பழனிசாமி, மாநகராட்சி ஆணையாளர் விஜயலட்சுமி, மண்டல தலைவர்கள் ரா.மனோகரன், காஞ்சனா பழனிச்சாமி, ஒன்றியக்குழு தலைவர் கண்ணம்மா முத்துசாமி, மாநகராட்சி செயற்பொறியாளர் ஆறுமுகம், உதவி ஆணையாளர் சண்முக வடிவேல், தாசில்தார் சுசீலா, ஒன்றிய ஆணையாளர் அசோகன் ஆகியோர் உடன் இருந்தனர்.