Urban News

தினமணி               05.04.2013

தாம்பரம் நகராட்சி குளங்களை சீரமைக்கும் பணி தீவிரம்

 

கிழக்குத் தாம்பரம் ஆதிநகர் குளத்தை பார்வையிடுகிறார் நகர்மன்றத் தலைவர் எம்.கரிகாலன். உடன் துணைத் தலைவர் கோபிநாதன், ஆணையர் சிவசுப்ரமணியன், பொறியாளர் சீனிவாசன். 

தாம்பரத்தில் நகராட்சிக்குச் சொந்தமான 8 குளங்களை தூர்வாரி    சீரமைக்கும் பணிகள் மேற்கொள்ளப்பட்டுள்ளன என்று தாம்பரம் நகர்மன்ற தலைவர் கரிகாலன் கூறினார்.

கிழக்குத் தாம்பரம் பகுதி மக்களின் கோரிக்கையை ஏற்று ஆதிநகர் குளத்தை தாம்பரம் நகர்மன்ற தலைவர் கரிகாலன் நகர்மன்ற ஆணையர் சிவசுப்ரமணியன், பொறியாளர் சீனிவாசன் ஆகியோருடன் புதன்கிழமை சென்று பார்வையிட்டு ஆய்வு செய்தார்.

 தெப்பத் திருவிழா காலத்தில் பொதுமக்கள் குளத்தில் இறங்குவதற்கு வசதியாக குளக்கரையில் தூர்ந்து போய் இருக்கும் படித்துறைகளைச் சீரமைத்துத் தரும்படி பெருமாள் கோவில் அறங்காவலர் வி.பாலன், வி.வெங்கடேஷ் ஆகியோர் கோரிககை விடுத்தனர்.

ஆதிநகர் குளத்தை ரூ.25 லட்சம் செலவில் தூர்வாரி, கரைமீது பொதுமக்கள் நடைபயில நடைபாதை அமைக்கவும, திருவிழா காலத்தில் பொதுமக்கள் தெப்பத் திருவிழா கொண்டாட நான்கு புறத்திலும் படித்துறை அமைக்கவும் நடவடிக்கை மேற்கொள்ளப்படும்.

தற்போது இரும்புலியூர், அற்புதம் நகர், கடப்பேரி, சேலையூர் உள்ளிட்ட பகுதிகளில் உள்ள நகராட்சிக்குச் சொந்தமான 8 குளங்களைச் சீரமைக்கும் பணிகள் தொடங்கப்பட்டுள்ளன. ஏழை, எளிய மக்களின் பசி போக்கும்  உணவகங்கள் முதல்வரின் ஆசியுடன் தொடங்க நடவடிக்கை மேற்கொள்ளப்படும் என்றார் கரிகாலன்.

தினமலர்                  05.04.2013

19,26,27 வார்டு மக்கள் 15ம் தேதிக்குள் குடிநீர் இணைப்புகள் அமைக்க வேண்டும்

திருநெல்வேலி:மேலப்பாளையம் மண்டலம் 19,26,27 ஆகிய மூன்று வார்டு பொதுமக்கள் வரும் 15ம் தேதிக்குள் புதிய குடிநீர் திட்டத்தின் கீழ் குடிநீர் இணைப்புகளை அமைத்துக்கொள்ள வேண்டும் என மேலப்பாளையம் மண்டலம் உதவி கமிஷனர் ஜோதிலிங்கம் தெரிவித்துள்ளார்.

இதுகுறித்து அவர் வெளியிட்டுள்ள அறிக்கையில் கூறியதாவது:

நெல்லை மாநகராட்சி மேலப்பாளையம் மண்டலம் 19,26,27 வார்டுகளுக்கான புதிய குடிநீர் திட்டப்பணிகள் முடிக்கப்பட்டு தற்போது செயல்படுத்தப்படவுள்ளது. இத்திட்டத்தின் மூலம் பயன்பெறும் பொதுமக்கள் தங்களது குடிநீர் குழாய் இணைப்புகளை பழைய திட்டத்தில் இருந்து மாற்றி புதிய குடிநீர் திட்டத்தின் கீழ் ப்ளோ கண்ட்ரோல் வால்வு அமைப்புடன் அமைக்க வேண்டும். பெரும்பாலான வீட்டு இணைப்புதாரர்கள் உரிய கட்டணம் செலுத்தி பழைய திட்டத்தில் இருந்து புதிய திட்டத்தின் கீழ் குடிநீர் குழாய் இணைப்புகளை மாற்றி அமைக்க எவ்வித முயற்சியும் மேற்கொள்ளவில்லை.

எனவே புதிய குடிநீர் திட்டத்தின் கீழ் பயன்பெறும் அனைத்து குடிநீர் குழாய் இணைப்புதாரர்களும் வரும் 15ம் தேதிக்குள் உரிய கட்டணம் செலுத்தி குடிநீர் குழாய் இணைப்புகளை அமைத்துக்கொள்ள வேண்டும். தவறினால் குடிநீர் குழாய் இணைப்புகள் துண்டிக்கப்படும். எனவே பொதுமக்கள் இந்த வாய்ப்பினை பயன்படுத்தி குடிநீர் குழாய் இணைப்பு துண்டிப்பினை தவிர்க்கும்படி கேட்டுக்கொள்கிறோம். இவ்வாறு உதவி கமிஷனர் ஜோதிலிங்கம் அறிக்கையில் கூறப்பட்டுள்ளது.