Urban News

தினமணி          24.03.2013

சிவகங்கையில் 2 பள்ளிகளுக்கு சுற்றுச்சுவர் கட்ட ரூ.20 லட்சம் ஒதுக்கீடு: நகராட்சித் தலைவர்

சிவகங்கையில் இரு பள்ளிகளுக்கு சுற்றுச்சுவர் அமைக்க ரூ.20 லட்சம்  ஒதுக்கப்பட்டுள்ளதாக நகராட்சித் தலைவர் எம்.அர்ச்சுனன் தெரிவித்தார்.

சிவகங்கையில் நகர்மன்றக் கூட்டம் தலைவர் எம்.அர்ச்சுனன் தலைமையில் வெள்ளிக்கிழமை நடைபெற்றது. இதில் துணைத் தலைவர் கே.வி.சேகர், ஆணையர் வரதராஜன், சுகாதார ஆய்வாளர் அய்யப்பன், நகர்மன்ற உறுப்பினர்கள் கலந்து கொண்டனர்.

இதில் தலைவர் அர்ச்சுனன் பேசியதாவது:

சிவகங்கையில் கோரிக்கை மனுக்களுக்குப் பதிவு எண் கொடுக்கப்பட்டு அனைத்து  மனுக்களும் கணினியில் பதிவு செய்யப்படுகிறது.

நீர் ஆதாரத்தைப் பெருக்கும் வகையில் நகரில் உள்ள அனைத்து ஊருணிகளும் தூர்வாரப்பட்டு கரைகள்  பலப்படுத்தப்படும்.

நகரில் 48 காலனி, சுண்ணாம்புக் காளவாசல் ஆகிய பகுதிகளில் உள்ள அரசு பள்ளிகளுக்கு சுற்றுச்சுவர் அமைக்க ரூ.20 லட்சம் நிதி ஒதுக்கீடு செய்யப்பட்டுள்ளது. சுற்றுச் சுவர் கட்டும் பணி விரைவில் தொடங்கும்.

பங்குனி உத்திரத் திருவிழாவுக்கு தேரோட்டம் நடைபெற வசதியாக வீதிகள் பராமரிக்கப்பட்டுள்ளன.

சிவகங்கை மன்னர் கல்லூரி எதிர்புறம் உள்ள கூட்டுறவு நிறுவனம் நலிவடைந்து அதன் அலுவலகக் கட்டடம் ஏலம்போகும் நிலையில் உள்ளது.  நகராட்சி நிர்வாகம் சார்பில் அரசு மதிப்பில் அந்தக் கட்டடத்தை ஏலம்போகும் முன் விலைக்கு வாங்கினால் நகராட்சிக்குப் பயனுள்ளதாக இருக்கும்.

அங்கு நகராட்சிக்கு சொந்தமான வாகனங்களை நிறுத்திக்கொள்ளலாம். எனது இந்த கோரிக்கையை தீர்மானமாக இக்கூட்டத்தில் நிறைவேற்ற வேண்டும் என்றார்.

துணைத் தலைவர் சேகர் பேசும்போது, காவிரி நடுவர் மன்ற இறுதித் தீர்ப்பை அரசிதழில் வெளியிடக் காரணமாக இருந்த முதல்வர் ஜெயலலிதாவுக்கு நன்றி தெரிவித்து தீர்மானம் நிறைவேற்ற வேண்டும் என்றார்.    இக் கோரிக்கை தீர்மானம் நிறைவேறியது.

தினத்தந்தி            24.03.2013

சேலம் மாநகராட்சி பகுதியில் ஓமியோபதி மருத்துவமனை கட்டுவதற்கு நடவடிக்கை எடுக்கப்படும் கருத்தரங்கில் மேயர் சவுண்டப்பன் தகவல்

சேலம் மாநகராட்சி பகுதியில் புதியதாக ஓமியோபதி மருத்துவமனை விரைவில் கட்டுவதற்கான நடவடிக்கை எடுக்கப்பட்டு வருவதாக கருத்தரங்கில் மேயர் சவுண்டப்பன் கூறினார்.

கருத்தரங்கம்

தமிழ்நாடு ஓமியோபதி மருத்துவ கவுன்சில் சார்பில் தொற்று நோய்கள் மற்றும் அதற்குண்டான ஓமியோபதி மருத்துவ சிகிச்சை குறித்த கருத்தரங்கம் சேலத்தில் நேற்று நடந்தது. தமிழ்நாடு ஓமியோபதி மருத்துவ கவுன்சில் தலைவர் டாக்டர் ஹனிமன் தலைமை தாங்கினார். மத்திய, மாநில ஓமியோபதி மருத்துவ கவுன்சில் உறுப்பினர் டாக்டர் என்.வி.சுகதன் வரவேற்றார்.

இந்த கருத்தரங்கில் சேலம் மாநகராட்சி மேயர் சவுண்டப்பன் சிறப்பு விருந்தினராக கலந்து கொண்டு பேசியதாவது:–

பொதுவாகவே ஓமியோபதி மருத்துவம் என்பது சிறப்பு வாய்ந்தவையாகும். ஓமியோபதி மருத்துவம் குறித்து பொதுமக்களிடம் விழிப்புணர்வை ஏற்படுத்த வேண்டும். ஓமியோபதி மருத்துவத்துறைக்கு தமிழக முதல்–அமைச்சர், தனி கவனம் மேற்கொண்டு சலுகைகளை அளித்து வருகிறார்.

புதிய மருத்துவமனை

சேலம் மாநகராட்சியில் புதிய ஓமியோபதி மருத்துவமனை ஆரம்பிக்க திட்டம் தயாரித்து சென்னைக்கு அனுப்பிவைக்கப்பட்டுள்ளது. அங்கிருந்து அனுமதி கிடைத்தவுடன்

ஓமியோபதி மருத்துவமனை விரைவில் கட்டுவதற்கான நடவடிக்கை எடுக்கப்படும். போதுமான டாக்டர்களும் நியமிக்கப்படுவார்கள்.

இவ்வாறு மேயர் சவுண்டப்பன் பேசினார்.

இந்த கருத்தரங்கில், மாவட்ட சித்தா மருத்துவ அலுவலர் டாக்டர் ரவி, ஓமியோபதி கவுன்சில் உறுப்பினர் கண்ணன் உள்பட பலர் கலந்து கொண்டனர். கருத்தரங்கு ஏற்பாடுகளை டாக்டர்கள் பிரபு, சதீஸ்குமார், வெங்கடேஷ் கோபி ஆகியோர் செய்திருந்தனர்.