Urban News

தினத்தந்தி            04.01.2014  

ஸ்ரீரங்கத்தில் வைகுண்ட ஏகாதசி விழாவுக்கு வரும் பக்தர்களுக்கு சிறப்பு ஏற்பாடுகள் மேயர் தலைமையில்அதிகாரிகள் பார்வையிட்டனர்

வைகுண்ட ஏகாதசி விழாவில் கலந்து கொள்ளும் பக்தர்களுக்கு தேவையான அடிப்படை வசதிகள் திருச்சி மாநகராட்சி சார்பில் ஸ்ரீரங்கத்தில் செய்யப்பட்டு வருகிறது. இந்த சிறப்பு ஏற்பாடுகளை திருச்சி மேயர் ஜெயா தலைமையில் அதிகாரிகள் நேற்று பார்வையிட்டனர்.

வைகுண்ட ஏகாதசி

108 வைணவ தலங்களில் முதன்மையானதும் பூலோக வைகுண்டம் என்று போற்றப்படுவதுமான ஸ்ரீரங்கம் ரெங்கநாதர் கோவிலில் கடந்த 31-ந்தேதி வைகுண்ட ஏகாதசி விழா தொடங்கி நடைபெற்று வருகிறது, முக்கிய திருவிழாக்களான மோகினி அலங்காரம் வருகிற 10-ந்தேதி (வெள்ளிக்கிழமை) மற்றும் சொர்க்கவாசல் திறப்பு வருகிற 11-ந்தேதி (சனிக்கிழமை) அதிகாலை 4-45 மணிக்கு நடைபெறுகிறது. விழாவுக்கு வரும் லட்சக்கணக்கான பக்தர்களின் அடிப்படை வசதிகளை செய்து கொடுப்பதற்காக ஸ்ரீரங்கத்தில் திருச்சி மாநகராட்சி சார்பில் பல்வேறு பணிகள் நடைபெற்று வருகிறது.

பக்தர்களுக்காக நடைபெற்று வரும் சிறப்பு ஏற்பாடுகளை திருச்சி மேயர் ஜெயா, துணை மேயர் ஆசிக் மீரா, ஸ்ரீரங்கம் கோட்ட தலைவர் லதா, ஸ்ரீரங்கம் உதவி கமிஷனர் ரெங்கராஜ், உதவி நிர்வாக என்ஜினீயர் அமுதவல்லி, உதவி என்ஜினீயர்கள் லோகநாதன், வேல்முருகன், கவுன்சிலர்கள் முத்துலட்சுமி(3-வது வார்டு),பச்சையம்மாள்(5-வது வார்டு) மற்றும் அதிகாரிகள் நேரில் சென்று ஆய்வு செய்து பார்வையிட்டனர்.

சாலை விரிவாக்கப்பணிகள்

ஸ்ரீரங்கம் காந்தி ரோட்டில் சாலையை விரிவாக்கம் செய்ய நடைபெற்று வரும் பேவர் பிளாக் போடும் பணி, சாலை ரோட்டில் தற்காலிக வாகனம் நிறுத்தும் இடம் அமைக்கப்பட்டு வரும் பணி, 56 சீட் கழிப்பறைகள் அமைக்கப்பட்டு வரும் பணி, குடிநீர் வசதிக்காக நடைபெற்று வரும் பணிகள் மற்றும் அம்மா மண்டபம் ரோட்டில் மழை நீர் வடிகால் அமைக்கப்பட்டு வரும் பணி, வடக்கு தேவி தெருவில் பள்ளிக்கூட கட்டிடப்பணி, அடைய வளஞ்சான் பகுதியில் பிரசன்னா பள்ளிக்கு கட்டிடம் கட்டும் பணி ஆகிய பணிகளை மேயர் தலைமையில் அதிகாரிகள் பார்வையிட்டு ஆய்வு செய்து விரைவில் செய்து முடிக்குமாறு உத்தரவிட்டனர்.

தினமணி             04.01.2014 

குடிநீர் வரி செலுத்தாவிட்டால் இணைப்பு துண்டிப்பு: மாநகராட்சி எச்சரிக்கை

திருநெல்வேலி மாநகராட்சியின் கீழ் குடிநீர் இணைப்பு பெற்றுள்ளவர்கள், தங்களது குடிநீர் வரியை செலுத்தாவிட்டால் குடிநீர் இணைப்புத் துண்டிக்கப்படுமென எச்சரிக்கப்பட்டுள்ளது.

இதுதொடர்பாக மாநகராட்சியின் மண்டல அலுவலகங்கள் மூலம் விநியோகிக்கப்பட்டு வரும் துண்டுப்பிரசுர விவரம்:

திருநெல்வேலி மாநகராட்சிக்குள்பட்ட குடியிருப்புதாரர்கள் தங்களது சொத்துக்களுக்கு 31-3-2014 வரை செலுத்த வேண்டிய சொத்துவரி, குடிநீர்க் கட்டணம், காலிமனை வரி, தொழில்வரி ஆகியவற்றை இன்றைய தேதிக்குள் செலுத்தியிருக்க வேண்டும். அவ்வாறு செலுத்தப்படாமல் இருந்தால் உடனே வரிகளைச் செலுத்தி ரசீதுகளைப் பெற்றுக் கொள்ள வேண்டும். இல்லையெனில் எவ்வித முன்னறிவிப்பும் இன்றி குடிநீர் இணைப்புத் துண்டிக்கப்படும் என குறிப்பிடப்பட்டுள்ளது.