Urban News

தினமணி           29.01.2014 

"பிளாஸ்டிக் கழிவுகளை ஒழிக்க அனைவரும் ஒத்துழைக்க வேண்டும்'

கோவை, ஆர்.எஸ்.புரம், மாநகராட்சிக் கலையரங்கில் பிளாஸ்டிக் பொருள் தயாரிப்பாளர்கள், தன்னார்வத் தொண்டு நிறுவனங்கள் மற்றும் மருத்துவமனை நிர்வாகிகள் இணைந்து, மாநகராட்சிப் பகுதிகளில் மருத்துவக்கழிவு மற்றும் பிளாஸ்டிக் கழிவுகளைக் கையாள்வது குறித்த ஒருங்கிணைப்புக் கூட்டம் செவ்வாய்க்கிழமை நடைபெற்றது.

 உற்பத்தியாளர்களின் ஒத்துழைப்புடன் பிளாஸ்டிக் பொருள்களைச் சேகரிக்க தனியாக மையங்கள் ஏற்படுத்தப்படும். பிளாஸ்டிக் தார்ச்சாலை அமைக்கவும் முயற்சி மேற்கொள்ளப்படும் என்று மேயர் செ.ம.வேலுசாமி தெரிவித்தார்.

 மாநகராட்சி ஆணையர் ஜி.லதா, துணை ஆணையர் சு.சிவராசு, துணை மேயர் லீலாவதி உண்ணி உள்ளிட்டோர் கூட்டத்தில் பங்கேற்றனர்.

தினமணி           29.01.2014 

மாநகராட்சி குடிநீர்த் திட்டம்:  ஜப்பான் அதிகாரிகள் பார்வை

கோவை மாநகராட்சியின் பில்லூர் இரண்டாவது குடிநீர்த் திட்டத்தை ஜப்பான் நாட்டு குடிநீர் வாரிய அதிகாரிகள் செவ்வாய்க்கிழமை பார்வையிட்டனர்.

 கோவைக்கு குடிநீர் வழங்கும் திட்டங்களில் பில்லூர் இரண்டாவது குடிநீர்த் திட்டமும் ஒன்று. இத்திட்டத்தை தமிழக முதல்வர் ஜெயலலிதா கடந்த 2012-ஆம் ஆண்டு ஜன. 24-ஆம் தேதி துவங்கி வைத்தார். இத்திட்டத்தின் மூலம் கோவைக்கு நாளொன்றுக்கு 63 எம்.எல்.டி. தண்ணீர் கிடைக்கிறது. இத்திட்டம் சுரங்கப்பாதை வழியாகச் செயல்படுத்தப்படுகிறது.

 இத்திட்டத்தை பவர் பாயின்ட் மூலம் ஜவஹர்லால் நேரு தேசிய புனரமைப்புத் திட்டத்தின் கண்காணிப்புப் பொறியாளர் ஞானேஸ்வரன், ஜப்பான் குடிநீர் வாரிய அதிகாரிகளுக்கு விளக்கினார்.

 கோவை மாநகராட்சியில் 24 மணி நேரமும் குடிநீர் வழங்குவதற்கான தொழில்நுட்ப உதவிகளை ஜப்பானிடம் இருந்து பெற உள்ளதாகவும், இங்குள்ள குடிநீர்த் திட்டங்கள் குறித்து ஜப்பான் அலுவலர்களுக்கு விளக்கப்பட்டதாகவும் ஆணையர் ஜி.லதா தெரிவித்தார்.

 ஜப்பான் குடிநீர் வாரியத்தின் செயல் இயக்குநர் சுகனோ தகாஷி தலைமையில் 4 பேர் கோவைக்கு வந்து பில்லூர் இரண்டாவது குடிநீர்த் திட்டம் குறித்துத் தெரிந்து கொண்டனர்.