Urban News

தினகரன்             02.01.2014

பேரையூர் பேரூராட்சியில் 100 சதவீத வரிவசூல் 13வது ஆண்டாக சாதனை

திருமங்கலம், :பேரையூர் பேரூராட்சி தொடர்ந்து 13வது ஆண்டாக 100 சதவீதம் வரிவசூல் செய்து சாதனை படைத்துள்ளது.

மதுரை மாவட்டத்தில் பாலமேடு, டி.கல்லுப்பட்டி, எழுமலை, பேரையூர், பரவை உள்ளிட்ட ஒன்பது பேரூராட்சிகள் உள்ளன. இவற்றில் பேரையூர் பேரூராட்சியில் இந்தாண்டு 100 சதவீதம் வரிவசூல் செய்து வரிவசூலில் மாவட்டத்தில் முதலிடத்தை பிடித்துள்ளது.

இந்த பேரூராட்சியில் வரியினங்கள் மூலம் 18 லட்சம் வசூலிக்க வேண்டும். இந்த இலக்கை பேரூராட்சி எட்டியுள்ளது.

இதுகுறித்து பேரூராட்சி தலைவர் குருசாமி கூறுகை யில், கடந்த ஜனவரி முதல் டிசம்பர் முடிய ஓராண்டில் பேரூராட்சியில் வரிவசூலில் 100 சதவீதம் வசூலித்து சாதனை படைத்துள் ளோம். ஏற்கனவே கடந்த 12 ஆண்டுகளாக எங்கள் பேரூராட்சி 100 சதவீதம் வசூலித்து சாதனை படைத்தது. இந்தாண்டு தொடர்ந்து 13ம் ஆண்டாக இந்த சாதனையை படைத்துள்ளோம்’ என்றார்.

தினகரன்             02.01.2014

பல்லாவரம் நகராட்சியில் விரைவில் தொடக்கம்: உணவு கழிவுகளிலிருந்து மின்சாரம் தயாரிக்கும் திட்டம்

தாம்பரம், : பல்லாவரம் நகராட்சியில் உணவு கழிவிலிருந்து மின்சாரம் தயாரிக்கும் திட்டம் தொடங்கப்பட உள்ளது. இதற்காக 22வது வார்டு ஐஸ்வர்யா நகரில் ஒருங்கிணைந்த நகர்ப்புற வளர்ச்சி திட்டத்தின் கீழ் ரூ90 லட்சத்தில் இதற்கான பணி நடைபெற உள்ளது. இந்த திட்டத்தின்படி தினமும் 420 முதல் 440 யூனிட் மின்சாரம் தயாரிக்கப்படும். இதன் மூலம் மாலை 6 மணி முதல் காலை 6 மணி வரை 480 தெரு விளக்குகள் எரிய வைக்கப்படும். ஒவ்வொரு விளக்கும் 40 வாட்ஸ் கொண்டதாக இருக்கும்.

இதற்கு தினமும் 5 டன் உணவு கழிவு தேவைப்படும். பல்லாவரம் நகராட்சியில் தினமும் 110 டன் குப்பை சேருகின்றன. இதில் 60 சதவீதம் மக்கும் குப்பை. இதில் 20 சதவீதம் உணவு கழிவுகள். உணவு கழிவுகள் அல்லாதவற்றை நீக்கி, மீதியுள்ள உணவு கழிவுகளை கொண்டு மின்சாரம் தயாரிக்கப்படும்.

பல்லாவரம் நகரத்தில் உள்ள 42 வார்டுகளில் 18 பெரிய ஓட்டல்கள், 17 திருமண மண்டபங்கள், 34 சிறிய ஓட்டல்கள் உள்ளன. மேலும் தள்ளு வண்டி, சிறிய டிபன் கடைகளும் நடத்தப்படுகின்றன. ஓரிரு வாரங்களில் இந்த பணிகள் தொடங்கப்பட உள்ளது. இதன் மூலம் மின்சார சிக்கனம், பணம் சேமிக்கப்படும் என அதிகாரிகள் தெரிவித்தனர்.

உணவு கழிவில் இருந்து மின்சாரம் தயாரிக்கும் திட்டம் ஆற்காடு நகராட்சியில் முதலில் மாதிரியாக தொடங்கப்பட்டது. இந்த திட்டம் வெற்றி பெற்றது. இதையடுத்து, 10க்கும் மேற்பட்ட நகராட்சிகளில் இந்த திட்டத்தை செயல்படுத்த தமிழக அரசு உத்தரவிட்டது. இந்த பணி ஆவடி, பூந்தமல்லி, திருத்தணி, காஞ்சிபுரம், கடலூர் உள்பட பல நகராட்சிகளிலும் செயல்படுகிறது.